Sámi pop konsearta Munch-museas
Bearjadaga njukčamánu 24 b. čuojaheaba Katarina Barruk ja Elina Waage Mikalsen Munch-museas.
Munch live dáiddalaš jođiheaddji Ingrid Moe muitala ahte sis lea mihttun loktet dálááigge ođasmahtti dáiddáriid ja musihkkáriid.
– Katarina Barruk lea dehálaš ođđa jietna Norgga pop-musihkas. Son lávlu áitojuvvon ubmisámegillii ja ráhkada sierralágán musihkalaš lanja hearkivuođas ja nanusvuođas.
Moe muitala ahte geahččit sáhttet vuordit fámolaš pop-konseartta.
Katarina Barruk muitala iežas illudit dasa.
– Lean hui ilus ahte Munch háliida searvat dán prošektii. Dat mearkkaša olu, go ii leat dávjá ahte sihke ubmi- ja mearrasámi kultuvrrat leat seamma lávddis oktanaga, čilge Barruk.