Nuorra kárášjohkalaš joatkkaskuvllaoahppiguovttos gávdnaba sihke dorvvu ja jaskesvuođa skuvlla girjerádjosis, muhto sutno mielas lea issoras smiehttat mannan vahkhkkoloahpa terrordáhpáhusain mat ledje Parisas Fránskkas.
– Mu mielas gal lea hui váralaš, oainnat dát leat geavvan Eurohpás dál. Miihan orrut Eurohpás ja sáhttá leat veahá issoras. Dathan leat áitán Norgga maid, lohká Renate Lindseth (18).
(Ášši joatkašuvvá gova vuolábealde)
Bearjadat eahkeda fallehedje terroristtat guhtta iešguđet saji Parisas. 129 olbmo goddojedje ja 352:s roasmmohuvve. Isláma Stáhta (IS) dat navdo leat terrora duogábealde.
– De lean mun maid fuobmán, ahte eai leat muitalan Bagdada, Beiruta ja buot eará sajiid birra, gos lea sullii seammá láhkái geavvan, lohká Tanja Mortelmans (19).
- Loga maiddái:
Norgii IS-soalddáhat?
Norgii bohtet dán áigái olu sihke dorvoohccit ja migránttat Ruoššas Storskog bokte Norgii. Politiijáid olgoriikalaččaid ossodagas (Politiets utlendingsenhet) váruhit, ahte dáid gaskkas maid sáhttet leat vejolaš tettoristtat.
– Mii eat dovdda daid geat deikke bohtet, dahje njuolga daddjon, mii eat dovdda dáid olbmuid duogáža, lohká Tor Espen Haga.
Nieiddaguoktás lea goappátge vuohki dustet dán dieđu.
– Vuosttasin mun in háliit diesa jáhkkit dalánaga, go dat lea mediija mii muitala ja dat lea hui dávjá, ahte mediija dušše muitala dalánaga go gullet juoidá, oaivvilda Mortelmans.
– Mun jáhkán dat sáhttá, juo. Muđuid gal ii livčče sáhttit boahtit Parisii. Dathan lea Eurohpás. Mun gal in jáhke, ahte lea dakkár mii dušše oktii dáhpáhuvvá, lohká Lindseth.
Gáttatgo dákkár terror sáhttá dáppe min guovlluin dáhpáhuvvat?
– Ii Kárášjogas gal. Mii leat lihkus nu guhkkin eret daid stuorra gávpogiin ja dakkár sajiin mas terroristtat beroštit. Terroristtat várra baicce háliidit Oslo fallehit, árvala Tanja Mortelmans.
– In jáhke dáppe Kárášjogas gal, vástida Renate Lindseth.