NRK Meny
Normal

Sámi musihkkárat eai nominerejuvvon Spellemann-bálkkašupmái: – Hui šállošahtti

Ii 2015:s iige 2014:s leat oktage sámi musihkkár nominerejuvvon dán bálkkašupmái.

elin kåven elin kåven

Sámi komponisttaid searvvi jođiheaddji Elin Kåven

Foto: Handout / NTB Tema

Ođđajagimánu 30 beaivvi sádde NRK 2015 Spellemannbálkkašumiid geigema ja odne lea Spellemann-lávdegoddi almmuhan makkár artisttat leat nominerejuvvon bálkkašumiide.

Spellemannbálkkašumis leat 26 iešguđet luohká, muhto ii ovttage luohkás leat sámi artista nominerejuvvon.

Loga dás geat leat nominerejuvvon

Ballá ahte sámi artisttat eai leat sádden musihka

Sámi komponisttaid searvvi jođiheaddji Elin Kåvena mielas lea dát hui šállošahtti, vaikko maid ballá ahte sámi artisttat eai leat sádden musihka juryii.

– Dat lea dieđusge hui šállošahtti, muhto dát lea maid dakkár ášši man birra mii leat hállan ovdal, namalassii man searat mii leat ieža iežamet musihka jođihit. Spellemann-bálkkašupmái galgá ieš sáddet musihka, muhto in dieđe leatgo sii geat leat almmuhan musihka vai eai, vai leago nu ahte jury ii leat válljen daid. Leat olu sámi almmuhusat mat leat buorit, muhto in dieđe leago Spellemann-juryii ollen buot dát musihkka.

Ballá ahte váilu gelbbolašvuohta

Kåven maid ballá ahte Spellemann-jurys ii soaitte leat gelbbolašvuohta sámi musihka ektui.

– Spellemann galggašii geahččalit eambbo oahppat sámi musihka birra, go ii leat sihkar ahte sis lea obage gelbbolašvuohta sámi musihka ektui.

Čakčat lei Oslos seminára gos sámi musihkkárat hupme dan birra movt sámi musihkka galgá máilbmái ollet. Spellemann-bálkkašupmi lea dat stuorimus bálkkašupmi maid Norggas sáhttá musihkkár oažžut, ja Kåven jáhkká dákkár bálkkašupmái nominerejuvvot ja vaikko vuoitit livččii hui ávkkálaš jus galgá máilbmái ollet iežas musihkain.

– Ártet

Sámi juoigiid searvvi jođiheaddji Biret Ristin Sara mielas lea ártet go sámi musihkkárat eai leat nominerejuvvon.

– Dat gal lea veahá imaš, lea almmuhuvvon hui olu musihkka diibmá. Lea váttis diehtit manne eai leat olahan dohko.

Sara lei ieš nominerejuvvon Spellemann-bálkkašupmái 2011:s rabas luohkás ovttas Inga Juusoin, gii lei guvttiin CDin nominerejuvvon, ja gii vuittii dán luohká Bárut-CDin.

– In lean goassege jurddašan ahte mu musihkka galgá olihit dohko, ja hirpmástuhtii mu ahte árbevirolaš luđiin olahin nu guhkás. Muhto luohti lea maid ođđaáigge musihkka, mii čuojahuvvo olu, nu ahte galggašii vuordit ahte sámi artisttat maid ollejit dohko.

– Maid don dahket olahit nominašuvnna?

– Mun bargen dušše iežan musihkain buoremus lági mielde. Uhccán jurddašin fuomášumi birra. Muhto mearkkašii hui olu munnje ja luohtái nominerejuvvot. Lei hui positiivvalaš.

Inga Juuso og Biret Ristin Sara

Biret Ristin Sara lei ieš nominerejuvvon Spellemann-bálkkašupmái 2011:s rabas luohkás ovttas Inga Juusoin, gii lei guvttiin CDin nominerejuvvon, ja gii vuittii dán luohká Bárut-CDin.

Foto: Siv Eli Vuolab / NRK