Helle Storvik fuomášii ahte sus lea sámi duogáš, dan ii lean oktage sutnje muitalan ovdalgo gulai das sohkadeaivvadeamis dás muhtin jagi áigi.
Nu gávnnahii son ahte ferte ohcagoahtit jávkan sámi álbmoga Viesterallasis. Ieš lei mánnán orron muhtin jagiid doppe, ovdalgo go etniinnis fárrii máttás.
Čohkkestii joavkku veahkkin
Helle Storvik čohkkestii joavkku, ja dát joavku lágidii konsearttažiid ja ságastallamiid. Mari Boine lei dat vuosttaš geainna son hálai dán áššis, ja son logai áinnas searvat ovttasbargui, maiddái searvvai govvideaddji Rune Johansen jovkui.
Govas gurot bealde Irene Persen, Mari Boine, Rune Johansen, Helle Storvik ja Åslaug Krokann Berg
Govvideaddji fuomášii ahte susge lea sámi duogás, dát movttiidahtii su searvat, lohká Storvik. Ja son fidnii maid dáiddára Åslaug Krokann Berg` mielde, sus gal ii leat sámi duogáš, muhto searvvai sidjiide veahkkin. Dasalassin searvvai vel Mari Boine ovddeš skuvllaskihpár Irene Persen musihkkárin mielde. Songe lea sámisogalaš ja bargá kulturskuvlla oahpaheaddjin Porsáŋggus. Persen lei mielde dan vahkkus go lágidedje konsearttažiid.
"Leat go mii ain dás/ Er vi her ennå"
Fáddán sin deaivvademiin ja konsearttažiin lei "Leat go mii ain dás/Er vi her ennå". Dáid deaivvadeamiid leat filbmen, ja das áigot dokumentára filmma ráhkadit. Ja čájáhusa maid.
Helle Storvik lohká iežas guhká smiehttan ja imaštallan dan ahte gosa Viesterallasa sámit leat šaddan, dan son smiehtagođii maŋŋá go gulai ahte sus lea sámi duogáš.
Iežas muitala fuomášan Johan Borgosa girjjáža, das logai ahte njeallját oassi Viesterallasa álbmogis lea sámi duogáš. Na dalle son gal easka viimmáskii, son fertii beare diehtit das eanet. Danne son čohkkestii alcces joavkku veahkkin lágidit deaivvademiid ja konsearttažiid.
Dáid deaivvademiin muitalii joavkku olbmot iežaset historjjáid ja olbmot ges muitaledje sin historjjás. Buot dáid muitalusaid leat sii vurken, buot lea filbmejuvvon videoi.
Dasalassin gallededje sii olbmuid ruovttuin, jearahalle ja govvidedje. Ja lassin vel fidne sii govvemin don dološ sámii ássanbáikkiid. Sii dáhtošedje gávnnahit dáinna mo Viesterallasa sámi kultuvra vuhtto dál, ja mo sin mearrasámi kultuvra sáhtašii eallit viidáseabbot.
Deaivvadeamit leat leamaš ávkkálažžan
Dát lea sis dego dakkáraš iskadeapmi, ja Viesterallasis leat olugat geat dáhtošedje boktit, ja dovddusindahkat iežaset sámivuođa. Ollugat leat rámis dainna go leat gávnnahan alddiin leat sámi duogáža.
Dál ferte sámivuođa dovddusindahkat
Helle Storvik lohká olbmuid mielas searvan dán prošektii, ollu eanebut bohte deaivvademiide, go maid son lei duosttan jurddašitge. Olbmot orro dego vuordán ahte gii nu hállágoahtá dás.
Son lohká gal ahte gávdnojit olbmot, geat eai eisige hálidivčče iežaset duogážis hállat. Dán lohká vuohttán, muhto ii oktage hálidan hállat singuin dáid áššiin. Doppe ledje maid muhtin bearrašiin oappažat ja vielljažat geat eai buohkat dahttun dovddahit iežaset sámi duogážis.
Ráhkada dás čájáhusa
Dáiddár Helle Storvik lohká dál iežas čohkkemin dieđuid čájáhussii, maid vuosttaš geardde lea vejolaš oaidnit Nyksunddas Viesterallasis boahtte geasi.
Muhto dás dáidá maid šaddat dakkáraš johtti čájáhus, ja dáidá maid šaddat oassin skuvllafáttás mii gohxoduvvo "Den kulturelle skolesekken".
Publikum/deltagere ved det første arrangementet vi hadde i Sildpollen i Eidsfjorden