NRK P3 doaimmahusa prošeakta Urørt álggahuvvui 2000s. Vihtta jagi maŋŋil ráhkadedje neahttabáikki masa artisttat sáhttet almmuhit dieđuid iežaset birra ja maiddái musihka vai dat lea guldalan-ládje.
Oanehis áiggis lea dát fálaldat šaddan hirbmat beakkánin musihkka-máilmmis, ja das leat dál badjel 22.000 geavaheaddji. Dán vahkku nammadii Urørt doaimmahus vuosttaš háve muhtun sámi joavkku "Ukas Urørtan", namalassi Gáivuonjoavku Alit Boazu lávlagiin "Láhppon". Go lea válljejuvvon "Ukas Urørtan", de mearkkaša dat ahte juste dán artista birra šaddá ollu sáhka radiosáddagiin juste dan vahkku. Ja dieđus ge čuojahuvvo dán artistta musihkka maiddái eanet dan vahkku.
Sámi artisttat maid leat Urørtas
Urørtas gávdná maid moadde sámi artistta. Doppe leat nu go Duolva Duottar, Alit Boazu, Áigi, Slincraze, Rolffa ja vel moadde eará.
-Dalle go Urørt álggahuvvui, de sii gal várra eai jurddašan dan ahte maiddái sámi musihkka ilbmá dohko, lohká prošeavtta jođiheaddji Henning Severud.
Sierra sámi šáŋger?
Urørtas leat sierra šáŋgerat maid artisttat ieža válljejit go almmuhit musihkaset dohko, nu go pop, rock, punk ja nie.
Dat mii ii leat nu álki dán áigge, lea gávdnat sámi musihka Urørtas. Go čállá "samisk", de ihtet vaikko makkár joavkkut mat eai oba soaitte ge leat sámi joavkkut eai ge lávllo sámegillii ge. Dat lea danne go vaikko gii sáhttá "tag'et" dan mii lea neahtas. ("Tag" lea sullii seamma go ohcansátni)
- Sii eai leat dássážii jurdilan ahte sámi šáŋger livččii maid galgan, muhto dan lea vejolaš ráhkadit. Dát han lea buorre jurdda, lohká Henning Severud.
Severud jáhkká ahte jus sii ráhkadit sierra sámi šangera, de várra diktet maiddái daid eará riikkaid sámi artisttaid almmuhit musihkaset Urørtai. Vaikko dá lea jurddašuvvon leat Norgga riikka musihkkáriid neahtta-almmuhanbáikin, de eai bálljo sáhte olgguštit daid eará riikkaid sámi artisttaid, lohká son.
Eanet sámegiella dás duohko?
Soaitá ahte "Ukas urørt" sámi joavku Alit Boazu Ukas dagaha ahte eanet sámi artisttat dás duohko almmuhišgohtet musihkaset nehttii.
- Dat han lea dušše buorre ja somá, nu guhká go dat lea musihkka mii heive radioi, lohká Henning Severud. Ja jus lea duohta dat maid Alit Boazu sidjiide muitala, de han sámi musihkkamáilmmis dáhpáhuvvá ollu dán áigge, ja ahte almmuhuvvo eanet aht' eanet sámi musihkka. Dán musihka gal háliidit sii NRK P3s maid gullat, lohká Severud.