Mii čorget stobu, borrat menddo olu buoiddes borramuša ja mii leat geavahan eanaš ruđaid juovlamárkaniin.
Juovlaruohta čohkkájit máŋggas kirkus ja čuvvot mielde, geat bohtet fárrolaga sisa ja geat bohtet okto.
Gal min juovllat leat oalle seammaláganat go dážaid juovllat.
Juovlamusihkka
Go vel juovlašuoŋaidge lávlut seamma nuohtaid mielde. Áidna erohus lea ahte mii lávlut sámegillii.
Dieđusge, dát juovlalávlagat leat hui čábbát ja mii vel buoret go gávdnojit sámegillii maid.
Nu go Mari Boine guoktá Roar Donssa «Nordnorsk Julesalme – Vuonagiid Juovlasálbma».
Ođđa Juovlašuoŋat
Maŋimuš jagiid leat oaidnán ahte sámi artisttat leat ieža ráhkadan juovlalávlagiid. Dán jagi dagai Kajsa Balto dan.
Son lea čállán guokte ođđa sámi juovlašuoŋa, «Stuorámus skeaŋka» ja «Muohtaga rátnu», maid almmuhii iežas skearrus «Sámi juovllat».
Dán skearrus gávnnat maid «Sámi juovllat» šuoŋa maid soaittát dušše rádios gullan, jus dus ii leat dat muhtun boares kaseahtas ruovttus.
Máŋgga hámis
Nu go maiddái muđuid máilmmis, de almmuhuvvojit juovlalávlagat ođđa hámis jámma, maiddái Sámis.
Dat mearkkaša ahte mii beassat válljet maidda dal liikot buoremusat, nu guhká go diehtit gos gávdnat.
Dán Spotify-listtus gávnnat olu ođđa ja boares sámi juovlašuoŋaid.
Urbbi jiellahat
Dá leat šuoŋat maidda Urbbi journalisttat liikojit buoremusat.
«Sámi Juovllat»: Dát lea čálli, Kolbjørn Norvanga, jiellat.
– Dán rádjai lean dušše beassan gullat rádios juovllaidáigge, muhto dál lea Kajsa Balto lihkus bádden šuoŋa. Livččen giitevaš jus Mari Boine maid sáhtášii ođđasit báddet, de beasan goappašiid šuoŋaid ruovttus guldalit.
«Gea šerres násti čuovgá»: Dán leaba sihke Elle Gaup-Johansen ja Wenche Marie Hætta namuhan iežaska jiellahin. Ii dat lea gal mihkkege ártegiid, Piera Jovnna Somby, Mia Rasmus ja Magnus Vuolab leat oainnat dahkan buori barggu fiinna lávlagiin.
«Boaresbártni Juovllat/Julekveld i skogen»: Dát lea Vanja Ulfsnes jiellat. Son ii máhte ieš gal sámegiela, muhto lea bajásšaddan dárogiel lávlagiin, nu ahte dás leat olu mánnávuođa muittut.
Dá mis vel juovlabonus dutnje!