– Olbmot fertejit oahppat ahte luohti addá vuoittu, dajai joavkku juoigi, John André Eira njuolga maŋŋel geigejumi.
– Luohti lea ihána čaffat, čuovvolii buvttadeaddji Ola Brandsnes Vårtun.
Gabba vuittii «árbevirolašmusihkka-kategoriijas».
Eira muitalii ahte sus álge luođit jorrat oaivvis go čurveje sin joavkku vuoitin.
– Juste dál lea joavkku buvttadeaddji luohti mii jorrá oaivvis dajai John André ja rohttehii iežas olbmá Ola.
Giitalii buvttadeaddji
Gabba joavku álggahuvvui measta dáhpedorpmis Kristiansandas, gos dát guhtta bártni vázze seamma skuvlla.
– Ola háliidii geahččalit luođi seaguhit Norgga álbmotmusihkkii iežas eksámen-konsearttas, ja nu jearai ahte searvvan go mun dasa, čilge John André.
– Giitu sutnje. Su haga ii livčče dát joavku gávdnot, dajai John André.
«Spellemann bálkkašupmi» lea Norgga stuorimus musihkkabálkkašupmi. Dál lei vihttalogát jahki go geigejedje bálkkašumiid.
– Movt galgat mii ávvudit dán vuoittu, jearai John André iežas joavkoláhttuin.
Buohkat ledje ovttaoaivilis ahte ferte biđđosiin ávvudit.
Ii áidna sápmelaš
Golmmás earát ledje maid nominerejuvvon «árbevirolašmusihkka» kategoriijas.
Sii ledje Julie Alapnes, Erlend Viken Trio, Akselsen/Kvernberg/Carstensen.
Julie Alapnessas lei sápmelaš Halvard Rundberg mielde doaluin. Son leage čállán golbma lávlaga Alapnessa albummas.
Spellemann-bálkkašumit juhkkojuvvojit ánsun Norgga musihkkariidda geat leat positiivvalaččat mearkkašahttán iežaset ovddit jagi.
Bálkkašupmi lea Norgga stuorimus musihkkabálkkašupmi, ja dá lei 50. jahki go bálkkašupmi geigejuvvui.