Sámi hábmen lea vuohki kultuvramet ávvudit

Sámi designmeassu Šoop Šoop lágiduvvo dán vuoru Troandimis.

Doppe gávnnadit olles riikka sámi designerat, buvttadeadjit, duojárat ja oastit.

Designmeassuin leat miehtá Sámi vuovdaleaddjit. Okta dain lea Gobmi / Ghost nammasaš fitnodat.

Gobmi / Ghost lea sámi urbána bivttasmálle. Dan leaba oappášguoktá Live Moen Johannessen ja Hanna Krogh-Reinsnes álggahan.

Sámi biktasat eai oidno doarvái mohtamáilmmis. Dan oaivvildeaba bivttashábmejeaddjit geat leaba álggahan ođđa fitnodaga.

– Eanaš sámi gálvvut vuvdojit mátkemuitun dahje daid oaidná museadávvirin. Nu dadjaba oappášguovttos Live Moen Johannessen ja Hanna Krogh-Reinsnes «Melk og Honning» magasiinna artihkalis.

Loga eambbo dás: Melk og Honning

Biktasiid bokte háliideaba Live ja Hanna nannet iežaska sámi kultuvrra ja identitehta.

Šoop šoop neahttasiiddus čállet ahte jáhkket bivttasmearkka šaddat ođđa dat-mearkan.

Sámevuođa fievrridit márkaniin

Orru ahte hábmejeaddjit leat ovttaoaivilis: sámi hábmen lea vuohki kultuvramet ávvudit, miehtá riikka.

Sámi stories vuovdaleaddji lea boahtimen Troandimii.

NRK Sápmi lea chatten Linda Mari Heitmann:in.

Linda Mari Heitmann (Sámi stories):Manne galgat čiŋahit ruovttuideamet Buddha-bácciiguin ja eará čiŋaiguin masa mis ii dáidde leat oba gullevašvuohta ge?

Linda Mari Heitmann (Sámi stories):Háliidan ovddidit sámi designa ja iežamet kulturárbbi, ja sáván buot Davviriikkat váldet dan vuostá.

Dan doarju Sámediggepresideanta:

– Sámi hábmen dahká vejolažžan čájehit sámevuođa juohke dálus. Sáhttá dagahit stuorát ipmárdusa servodagas sápmelaččaid ektui, lohká Silje Karine Muotka.

Okta vuovdaleaddjiin lea «Mii Leat» designer Anja Johnsen Thonhaugen.

NRK Sápmi lea maiddái suinna chatten.

Anja Johnsen Thonhaugen (MII LEAT):Sáván biktasiiddan bokte sámevuohta boahtá eambbo oidnosii árgabeaivvis: ahte oaidnit sámevuođa dávjjit.

Olu vejolašvuođat

Márkanat illudahttet Silje Karine Muotka.

Son oaivvilda sámi hábmejeaddjiid ánssášit stuorát márkaniidda beassat.

– Mis leat hirbmat čeahpes duojárat ja sámi hábmejeaddjit. Dan suorggis lea stuorra potensiála, dadjá Muotka.

Sámediggepresideanta sávvá meassut nannejit fitnodagaid.

– Dán lágideami bokte sáhttet dat geat ostet gálvvuid fuomášit sámi hábmejeaddjiid, ja nu fitnodagat sturrot, muitala sámediggepresideanta.

– Ulbmil dáinna meassuin lea doarjut ja nannet fitnodagaid, muitala Muotka.

Ođđasat - Davvisámegillii

11. mars 2022 kl. 13:34

Šoop Šoop bálkášumi vuoitit

Erica Huuva Design ja Davvi Siida leaba vuoitán Šoop Šoop bálkkašumi maid Norgga Sámediggi lea ásahan. Šoop Šoop bálkkašupmi galgá jahkásaččat geigejuvvot, muhto go diibmá ii šaddan de geigejuvvo sihke 2021 ja 2022 bálkkašupmi dál, čállá Sámediggi preassadieđáhusas.

2021 vuoiti lea Erica Huuva Design, Erica Huuva lea Ruoŧa beale silbaduojár, 2022 vuoiti lea fas Davvi Siida, Norgga beale bearašfitnodat Gilevuonas.

Maja Kristine Jåma geigii bálkkašumiid Sámedikke bealis odne Troandimis.