Lávllačálli illuda go Sámi Grand Prix rievdá

Boahtte jagi ii leat gilvu dušše juigiid ja lávluid gaskkas.

Lena Marie Thuri

MOVTTIIDAHTTE: Lávllačálli Lena Marie Thuri illuda go Sámi Musihkkafestivála sáhttá veahkkin ohcat lávlu su lávlagii.

Foto: Priváhta

Boahtte beassážiid lágiduvvo Sámi Grand Prix, Guovdageainnus, golbmaloginuppit geardde.

Dál almmuha Sámi Musihkkafestivála preassadieđáhusa, mas čállet ahte dán vuoro sii eai oza dušše lávluid ja juigiid.

Sámi Grand Prix

SAMI GRAND PRIX : Ella Marie Hætta Isaksen šattai lávlunoasi vuoiti 2016:s.

Foto: Ánne Kátjá Gaup / preassagovva

Gilvu maiddái lávllačálliide ja buvttadeddjiide

– Jus leat čállán lávlaga, muhto it hálit ieš dan lávlut, de galggašit midjiide sáddet dan. Mii geahččalit gávdnat lávlu lávlagii, lohka festiválabuvttadeaddji Elle Mari Dunfjell Oskal.

Danne ávžžuha Dunfjell Oskal maiddai lávluid váldit singuin oktavuođa vaikko sis ii leat lávlla maid háliidit ovdanbuktit.

Elle Mari Dunfjell Oskal

DIEĐIHEAPMI ÁRABUT: - Mii rahpát dieđiheami gilvvuide árabut, vuoi mis lea vejolaš ovttasbargat eanet lávluiguin ja juigiiguin, lohka festiválabuvttadeaddji Elle Mari Dunfjell Oskal.

Foto: Niels Ovllá Oskal Dunfjell

– Fáhkka sáhttá mis lávlla mii heive juste dán lávlui, lohka son.

– Dát gal movttidahttá

Lávllačálli Lena Marie Thuri (30) illosa go gullá ahte SGP dál fállá dákkár vejolašvuođaid.

Lena Marie Thuri

GUHKA OHCAN: Lena Marie Thuri čállá ieš lávlagiid ja hábme šuoŋa, muhto ii leat vel gávdnan lávlu gii heivešii ovdanbuktit lávlagiid.

Foto: Privat

– Dát lea duođai buorre fálaldat Sámi Musihkkafestiválas. Jáhkán dát movttiidahttá ođđa lávllačálliid ja lávluid boahtit oidnosii, lohka Thuri.

Son lea ráhkadan máŋga lávlaga, muhto ii leat vel gávdnan rievttes lávlu.

«Áiggut go dál sáddet iežat lávlagiid SGP?»

– Juo, lean máŋga jagi juo árvvoštallan searvat, muhto in leat gávdnan lávlu, lohka Mázelaš lávllačálli, Lena Marie Thuri.

Ii dárbbaš gárvves lávlla

Sámi Musihkkafestivála-buvttadeaddji muitala ahte sii leat muhtomin ožžon lávlagiid mat eai leat lahkage gárvásat.

– Muhtumat dušše derpet beavddi, earát ges spillejit gitárain dan botta go lávlot. Mii gal gullat mas lea buorre potensiála, lohka Dunfjell Oskal.

Luohti lea eanas olbmuide hui persovnnalaš ja danne ii soaitte seamma vuohki heivet juigiide, árvvoštallá buvttadeaddji.

Sámi Gran Prix 2019

ÁRBEVIROLAŠ LUOHTI: Árbevirolaččat juoigi dovdá olbmo gean juoigá. Danne sáhttá váttis juoigat luođi maid nubbi olmmoš lea bidjan.

Foto: PREASSADIEĐÁHUS

Eanet dieđuid dieđiheami birra gávnnat Sámi Musihkkafestivála siidduin.

– Dađi árabut oasseváldit váldet minguin oktavuođa, dađi buoret vejolašvuođat leat mis ovttas ovdánahttit lávlagiid, lohka Dunfjell Oskal gii vuohččan buvttada beassášfestivála.