Sámi girječállit eai olahan bálkkašumi

DR Koncerthuset báikkis Københámnas Danmárkkus dat Davviriikkaid Ráđi girjjálašvuođa bálkkašumi riemut lágiduvvojedje disdat eahkeda.

– Dat lea buorre go poesiija-čálli oaččui bálkkašumi, dadjá Sara Margrethe Oskal maŋŋel go čielggai ahte Katarina Frostenson oaččui bálkkašumi.

Loga: Girjeárvvoštalli: – In jáhke sámi girječálli oažžut bálkkašumi

2016 Bálkkašumit

Jagi 2016 Davviriikkaid ráđi girjjálašvuođa bálkkašupmi geigejuvvui ruoŧa girječállái Katarina Frostenson:ii. Son oaččui bálkkašumi girjji "Sånger och formler"girjji ovddas.

– Dát bálkkašupmi illudahttá sihke mu ja diktačállima. Mun lean čállán poesiija oalle guhka. Muhto mu mielas lea earenoamáš somá oažžut bálkkašumi juste dáinna diktagirjjiin, go mun čállen dán girjji dalle mus lei earenoamáš dovdu. Sihke moraš ja jáhkku. Ja danin mu mielas lea hui dehálaš ahte poesiija oažžu stuorat saji dan oktavuođas go bálkkašumi geigejedje munnje, lohká Katarina Frostenson.

Mánáid- ja nuoraid girjjálašvuođa bálkkašupmi geigejuvvui ges Islándalaš girječállái,

Arnar Már Arngrímsson:ii. Son oaččui bálkkašumi girjji "Sölvasaga unglings" (”Sølvi, muitalus nuorra olnmo birra”)

– Mun in vuordan oažžut bálkkašumi. Guhtta mánu áigi nammaduvvon dása ja dat lea leamašan guhkes vuordináigi gitta otná stuora beaivái. Eará girjjit mat ledje nammaduvvon leat nu buorit, nu ahte mun lean hui giitevaš, lohká Arnar Már Arngrímsson

Guokte sámi girjji

Sámi girječálli Sara Margrethe Oskal lei evttohuvvon Davviriikkaid Ráđi girjjálašvuođa bálkkašupmai girjjiin savkkuhan sávvri sániid.

Mánáid- ja nuoraid girjjálašvuođa bálkkašupmái leigga ges Marry Ailonieida Somby ja sárgunčeahppi Biret Máret Hætta evttohuvvon girjjiin Čerbmen Bizi, girdipilohtta.

– Mu mielas lea hui buorre go unnitlogu álbmoga gielat leat mielde dáppe, muhto mis livččii galgan maid jury-mielláhttut geat ipmirdit dáid gielaid,dadja Marry Ailonieida Somby.

Davviriikkaid Ráđi sešuvdna

Bálkkašumiid geigejit diimmá girjjálašvuođa bálkkašumi vuoitit, Hákun Djurhuus, Svante Henryson¸ Dagur Kári ja Jakob Wegelius ja dasa lassin vel Kim Leine. Davviriikkaid Ráđi bálkkašumi sturrodat lea 350.000 dánska ruvnmno. Girjjálašvuođa bálkkašumi geige lágiduvvo davviriikkaid Ráđi 68. deaivvadeami oktavuođas Københámnas, Danmárkkus.

Son guhte lei láidesteaddji doaluin, lei dánska-ruoŧa lávlu, Caroline Henderson. DR dahje dánska Radio, mii lea NRK sullálaš mediaásahus Danmárkkus sáddii doaluin njuolggosáddaga bakte interneahtas, ja maiddái eará davviriikkaid TV-ásahusaide.

Juhkkojuvvon 1962 rájes

Davviriikkaid Ráđi girjjálašvuođa bálkkašupmi lea juhkkojuvvon 1962, ja juhkkojuvvo čáppagirjjálašvuođa girjái mii lea čállojuvvon ovtta davviriikkaid gielaide. Girji sáhttá leat romána, drámá, dikta, novealla dahje essija čoakkáldat.

Bálkkašumi ulbmil lea ásahit beroštumi ja fuomášuhttit davviriikkaid girječálliid, seammás go galget ásahit báikki dahje sajádaga gos sin girjjálašvuohta sáhttá ceavzit buot davviriikkaid rájáid rastá.

Dát dagaha ahte girjjálašvuođa oktasašvuohta ja kultuvrralaš čanastagat ovdánahttojuvvojit ja nannejuvvojit davviriikkaid gaskkas.

Doaluide searvvai maiddái Dánmárkku ruvdnoprinsa Fredrik.