Sámi filbmadahkkit gilvalit alla dásis

Vihtta sápmelaš filbmabuvttadeaddji leat nammaduvvon filbmafestivála bálkkašupmái.

Dát illodahttá Internašunála sámi filbmainstituhta direktevrra Anne Lajla Utsi.

– Dát lea buorre ovdáneapmi. Sámi filmmat dohkkejit maid eará čehpiid searvái. Mii leat máŋgii cuiggodan go buorit sámi filmmat eai leat nammaduvvon bálkkašumiide TIFF:as.

Sámi filbmadahkkit dollet alla dási

Dán vahkus čoahkkanit filbmaberošteaddjit miehta máilmmi Romsii. TIFF lea Norgga stuorámus filbmafestivála ja lágiduvvo 28. geardde. Diibmá ledje buohkanassii badjel 60 000 oasseváldi.

– Sámi filbmabuvttadeaddjit dollet alla dási ja sámi filmmat leat dál šaddan lunddolaš oassin Romssa filbmafestiválas, lohká Anne Lajla Utsi.

Beassát čájehit filmma TIFF:as lea stuora gudni muitala Yvonne Thomassen. Son lea ráhkadan oanehis filmma «Akvarium» mas lea vuosttaščájáhus odne.

– Dušše beassát oassálastit dán festiválas lea gilvu. Dáppe leat ollu geahččit miehtá máilmmi ja dat addá stuora vejolašvuođaid fuomášuhttit filmma.

Illudan beassát čájehit filmma odne

«Akvarium» filbma lea muitalus nuorra Syrialas bártni, Amir, birra gii láhppo garra dálkin. Son gávdná muhtin vissui gos vuorraset sámi almmái orru. Sudnos leat sullasaš vásáhusat. Dán muitalusas deaivvadeaba historjá ja dalá áigi.

– Lean gealdagasas beassát čájehit filmma odne. Dušše filmma ruhtadeaddjit leat oaidnán dan ovdal, lohká buvttadeaddji Linn Henriksen.

Romssa internášunála filbmafestiválas čájehit filmmaid árrá iđidis gitta idjii. Katri Somby lea indogas filbmaberošteaddji.

– Mon vuorohan sámi filmmaid ja dat livčče áinnas oažžut leat vel eanet. Mon geahčan maid ollu ártegis filmmaid festiválas maid muđui in geahča.

Dát filmmat leat nammaduvvon filbmafestivála bálkkašupmái.

• Amanda Kernell, «I will always love you, Kingen»
• Suvi West, «Under two skies»
• Inga-Wiktoria Påve ja Anders Sunna, «Morit Elena Morit»
• Ellen-Astri Lundby, «Brennende minner»
• Ann Holmgren, «Volcano»