- Les saken på norsk.
Eatnašat leat gullan ahte artisttat mátkkoštit bussiin go vulget čuojahanmátkái, muhto hárve várra gullo ahte sis lea fanas. Ja dat ahte fanas dasa lassin doaibmá lávdin lea vel ain apmaset sáhka.
Nu šaddá dál geasset, go Gáivuon-joavku Violet Road vuolgá čuojahanmátkái Davvi-Norggas.
– Mii illudit fas čuojahit báikkis gosa olbmot bohtet min gullat, dadjá čuojaheaddji Håkon Rundberg, guhte illuda dasa ahte bargat ja oađđit seamma sajis – namalassi fatnasis.
Vulkana dat lea sin bargosadji dán geasi. Boares guollebivdofanas dat lea, man bássa-čuojaheaddji Hogne lea oastán.
Joavku lea ollu jagiid jurddašan ahte galggaše hutkat earenoamáš vuogi mielde vuolgit mátkái, ja dál de šattai dát duohtan. Koronadoaimmat leat bággen artisttaid ja lágideddjiid leat hutkái.
Ulli lokte sin oidnosii
Violet Road geahččalattai movt dat lea čuojahit Vulkanas, ja de fuomášedje ahte mearas gal lea ulli mii mearrida oidnojit go sii gáddái.
Álggadettin de oidnui dušše bajit oassi sis, muitala Håkon Rundberg. Ja go konsearta nogai, de lei ulli bajidan fatnasa nu ahte olbmot oidne maiddái sin julgiid, eai ge dušše oivviid.
– Naba siseatnamis? Sáhtášii go Violet Road doallat konseartta johkafatnasis?
– Ha ha ha! Die de lei somás jurdda! Dien mii gal fertet muitit, reašká Håkon.
12 olbmo dat galget orrut ja bargat Vulkanas, ja Håkon dadjá ahte sii šaddet gal measta badjalaga, eai ge doalahit mehtera gaska, nu movt galggašii. Ja ii ge soaitte nu álki oažžut nahkáriid go ollugat leat fárrolaga olles áiggi.
Loga eanet geassekonsearttaid birra
Mari Boine konsearta.
NJUOLGGOSÁTTA: Mari Boine joavkkuinis čuojaha Olmmáivákkis, ja dát oidno neahtas dalle go lea konsearta.
- Gos: Olmmáivákkis, Davviálbmogiid guovddáš.
- Goas: 26.6 dii. 20.00.
- Billeahtta jus manat konseartabáikái.
- Nuvttá geahččat njuolgga Facebookas ja Youtubes.
Konseartttat suoidnemánus
HammerfestDagan lágiduvvojit, ja doppe leat konsearttat sihke bearrašiidda ja eahketkonsearttat. The Montenegro rhytm & blues, Staysman ja KEiiNO.
- Gos: Ráđđeviesušilljus, Hámmárfeasttas.
- Goas: 15.-18.7.
- Billeahttavuovdin.
Violet Road čuojaha dán geasi Norgga hábmaniin.
- Gos: Vuošvákkis, Čieŋalluovttas, Uliluovttas, Ivgomuotkkis, Husøy, Meløyvær, Risøyhamn, Rivttágis.
- Goas: 15.- 25.7.
- Billeahttavuovdin.
Sámi festivála-vahkoloahppa. Marja Mortensson, Kajsa Balto, DJ IDJA & ÅVLA, KEiiNO ja NIILAS. Lágideaddji: Márkomeannu ja SALT art & music.
- Gos: SALT art & music, Festningsallmenningen, Oslos.
- Goas: 24.-25.7.
- Billeahttavuovdin.
Nordkynfestivalen fállá konsearttaid. Ken-Thomas, Anne Nymo Trulsen ja Baluba Boys.
- Gos: Donjevuonas.
- Goas: 23.-25.7.
- Billeahttavuovdin.
Konsearttat borgemánus
Varangerfest 2020 lágida konsearttaid, earret eará Daniel Herskedal Quartet, Vadsø Storband ja Northern soul artisttain. Lágideaddji: Varangerfestivalen.
- Gos: Tollbugata, Čáhcesullos.
- Goas: 6.-8.8.
- Billeahttavuovdin.
Violet Road
- Gos: Støtt, Nesna og Lurøy.
- Goas: 6.-8.8.
- Billeahttavuovdin.
Ijahis idja, Anáris
- Njuolggostreama (loga eanet ijahisidja.fi)
Dáin festiválain eai leat doalut
- Midnattsrocken
- Beskán Luossa Rock
- Kunesdagan
- Dansklacken På Dosan
- Isogaisa
- Bugøynesfestivalen
- Gorosofestivalen
- Kirunafestivalen
- Raasten Rastah
Loga máiddái: árvvoštallet galget go festiválat máksit doarjagiid ruovttuluotta.
Tipse midjiidde konsearttaid ja festiválaid birra maid mii kánske leat vajálduhttan, sáddes e-poastta deike saminyhetsavdeling@nrk.no.