Ieš oaivvilda Ole Henrik Hætta ahte leat mávssaheame su go máŋgii lea cuiggodan iežas dili.
Romssa giddagasa beales leat sutnje lohkan ahte leat čavgen permišuvnnaid, ja dan dihte son ii oaččo permišuvnna.
Jáhkká mávssaheame
Ole Henrik Hætta lea guhká áŋgiruššan buoridit sámi fáŋggaid dili. Máŋgga reivves lea cuiggodan Romssa giddagasa gos ieš čohkká, go earret eará ii leat beassan iežas olbmuiguin hupmat sámegiela. Maiddái siviláittardeaddji lea čuvvon ášši.
Romssa giddagasa bealis leat vuhtiiváldán cuiggodemiid, muhto Hætta goitge jáhkká ahte dál leat sunnje mávssaheame go eai šat atte nu gohčoduvvon velferdspermišuvnna fitnat doaktára luhtte, muhto baicce sihtet su atnit dábálaš permišuvnna.
– Váddásat Hætta ektui
Hætta advokáhtta Per Arne Johnsen, lohká iežas oalle easka ovddastišgoahtán Hætta, ja danin ii leat vel čiekŋudan dán áššái, muhto su mielas vuosttaš geahčesteamis orrot giddagasa bealis njulgestaga váddásat Hætta ektui.
Ikte eat ožžon Romssa giddagasa bealis ovttage vástidit dáidda moaitámušaide.