NRK Meny
Normal

Sámi dáiddaskuvla ii álggahuva

Sámi Dáiddačehpiid Searvi lea guhká plánen ásahit dáiddaskuvlla Kárášjohkii, muhto Oahpahusdirektoráhta ii atte lobi dan álggahit.

Samisk kunstnersenter
Foto: Sigve Nedredal / NRK

Sámi dáiddaskuvlla vuođđudusa prošeaktajođiheaddji Dag Nyberg imašta dán mearrádusa.

– Finnmárkkus ja Romssas ii gávdno sullasaš fálaldat. Olles Davvikálohtas ii ge leat dákkár skuvla, lohká Nyberg.

Vuođđudus lea bargan badjel njeallje jagi prošeavttain man ulbmil lea álggahit priváhta dáiddajoatkkaskuvlla.

- Skuvllas galggašii oahpahit ohppiide govvadáidaga. Skuvllas galggašii rabas buohkaide, das galggašii sámi- ja davviguovlluid profiila, čilge Nyberg.

Prošeakta lea ožžon ruhtadoarjaga sihke Sámedikkis ja Finnmárkku Fylkkadikkis, muhto Oahpahusdirektoráhta ii dohkket dáiddaskuvlla oahppoplána. Sii celket ahte plána sulastahttá almmolaš joatkkaskuvllaid plánaid.

GULDAL: EAI BEASA ÁLGGAHIT DÁIDDASKUVLLA

Sámedikke áirras Vibeke Larsen šálloša Oahpahusdirektoráhta mearrádusa.

- Mii gal doarjut dáiddaskuvlla, dat lea dárbu ásahit dákkár skuvlla.

Dál lea Sámi dáiddaskuvlla vuođđudus váidán ášši Máhttodepartementii.
Departemeantta bealis eai sáhte kommenteret ášši nu guhkká go gieđahallet dan.