Dáiddár Iver Jåks lei dovddus maiddái olggobealde sámi dáiddabirrasa, ja oaččui eallinagis ollu ánssu ja rámi barggus ovddas. Dáiddárin son barggai sihke tevnnegiiguin, njuohtamiiguin ja ollu eará dáiddačehpolaš vugiin.
Rámiduvvon dáiddár
Son oaččui ollu balkkašumiid, earret eará Norgga kultturráđi gutnibalkkašumi 1992s. Ja 2002s námmaduvvui son St.Olav orden:a 1. klássa riddárin, mii lea stuorámus gutni maid Norgga riika addá stáhtaborgáriidda.
Dáiddár usttibat muittašit
Dáiddár Synnøve Persen dajai seammás go gulai Iver Jåks jápmimis dan ahte sii dál leat massán dehálaš ofelačča, go son lei duostilis dáiddár. Dál fertejit sii oahppat birget su haga. Persen lohká dáiddáriid leat giitevažžan dasa go sin gaskas lea leamaš nu duostilis dáiddár. Iver Jåks dat fuopmášahtii sin ahte sii galget leat čeavlái dainna go leat dáiddárat.
Riegádii boazobearrašii
Iver Jåks riegádii Kárášjogas 1932:s boazodoallobearrašiid , muhto ii sáhttán bargat boazodoalus danne go lápmašuvai nuorran ja nu šattaige olu leat buohcceviesus ja veajuidahttimis. Doppe son álggiige sárgut govaid, muhto 50- 60-logus álggii son duddjot maid.
Duojár Jon Ole Andersen muittaša Iver Jåksa duojárin, son han barggaid olu čoarvedujiiguin, ja iežas muitala maid bargan ovttas Iver Jåksain dalle go son ráhkadii bácciid, mat leat oaidnimis dál ain Kárášjogas.