Niko Valkeapää, Áilloš, Inga Juuso ja Skáddjil galget čuojahit guokte dahje golbma konseartta guhtege Folkelarm festiválas, mii lágiduvvo Oslos čakčamánu 25. gitta 28. beaivái, čállá Ávvir.
Folkelarm vuođđojurdda lea dahkat álbmotmusihkkaártisttaid eambbo oidnosii vai oaččošedje eambbo čuojahanbargguid. Folkelarm galggašii leat vuovdin- ja čalmmustahttindáhpáhus álbmotmusihkkii.
Valkeapää duhtavaš
Niko Valkeapää lea duhtavaš go lea beassan dán jagi Folkelarmii ja son navdá dán sutnje stuorra veahkkin beassat viidáset musihkainis.
- Dat addá stuorra vejolašvuođa boahtit oidnosii ja čájehit iežan musihka, lohká Niko Valkeapää Ávvirii. Dán mánus son almmuhage iežas goalmmát skearru "Birrat birra". Vuosttaš skearrus "Niko Valkeapää" ovddas oaččui son Spellemann-bálkkašumi.
Vuoruhit sámi ártisttaid
Folkelarm prošeaktajođiheaddji, Elisabeth Vatn, lohká dán jagi vuoruhan sámi ártisttaid.
- Ovdal lea leamaš soaittáhagas leago ártista beassan čuojahit dáppe vai ii, muhto dál leat mii álggahan ovttasbarggu earret eará Juoigiid servviin, Sápmi musihkain ja Sámi komponistaservviin. Dál áigut vuoruhit sámi musihka ovddasguvlui, čilge Vatn áviisii.
Ovdal leat earret eará Adjágas ja Torgeir Vassvik čuojahan Folkelarmas. Jagis 2006 vuittiige Lars-Ante Kuhmunen Folkelarm-bálkkašumi skearrus "Birrasis" ovddas. Dát bálkkašupmi ásahuvvui jagis 2005 molsaeaktun Spellemann-bálkkašupmái.