Garra vásáhusat Brasiila arvevuvddiin riegádahtte ođđa luođi

– Mu mielas lei ilgat oaidnit man láhkái guovllu arvevuovddit leat vuovddehuhtton.

Johan Sara Jr.

Johan Sara Jr. bijai ođđa luođi, go duvle lei johtimin Mato Grosso arvevuvddiin Brasiilas.

Foto: Dan Robert Larsen / NRK

– Dás lea hirbmat stuorra váikkuhus eamiálbmogiidda ja eará olbmuide geat ásset guovllus. Seammás dat čuohcá olles máilmmi dálkkádahkii, šuohkiha Johan Sara Jr.

Johan Sara Jr.

Johan Sara Jr.

Foto: Dan Robert Larsen / NRK

Mannan dálvve son bovdejuvvui rahpat dálkkádatkonferánssa «Oslo Tropical Forest Forum», mii dál dollo Norgga oaivegávpogis. Lágideaddji lea Norad, Ovdánahttinovttasbarggu direktoráhta, ja 500 olbmo 50 riikkas oassálastet.

– Vástidin ahte dan gal sáhtášin, muhto háliidivččen ieš beassat fitnat ja oaidnit mo dilli lea dain guovlluin gos eamiálbmogat ásset arvevuvddiin, čilge Sara.

Dan botta go Sara ieš juoiggai lávddi alde, de čájehuvvui video mas oaidná oasáža das maid Johan Sara Jr. vásihii mátkkistis arvevuvddiide.

Viiddis guovllut

Johan galledii Enawe Nawe-álbmoga, geat ásset Cuiaba-guovllus Mato Grossos. Mato Grosso lea Brasila goalmmádin stuorámus oassestáhta, gos ásset badjel guokte miljovnna olbmo.

Dát lea okta dain deháleamos guovlluin Brasila eamiálbmogiidda, muhto lea maid dat guovlu Brasilas gos eanemus arvevuovddit leat billašuvvan.

– Eamiálbmogat válde min bures vuostá. Sii čájehedje mo sii ásset ja man láhkái sii leat sorjavaččat lundui. Sis lei oppa áigge hirbmat buorre mokta. Mii beasaimet lávlestit ja dánsestit ovttas, muitala son.

Bulldoserne brøyter vei i regnskogen

Čájáhusgovva. Miehtá máilmme billašuvvet arvevuovddit go olbmot dárbbašit eatnamiid eanandollui ja industriijaatnui.

Foto: Christine Præsttun / NRK

Bealli arvevuvddiin jávkan

Arvevuovddit buvttadit stuorra oasi dan áimmus maid máilbmi dárbbaša vai olbmot sáhttet vuoigŋat, ja dain lea stuorra mearkkašupmi dálkkádahkii.

Maŋimuš fargga 60 jagis leat máilmmi arvevuovddit beliin unnon. Jagis 1960 ledje máilmmis árvvu mielde 14 miljon km² arvevuovddit, čájehit World Resources Institute logut. Ovttastahtton Nášuvnnaid (ON) idieđuid mielde leat dál máilmmes 7 miljon km² arvevuovddit.

Ola Elvestuen

Dálkkádat- ja birasministtar Ola Elvestuen (Gurutbellodat)

Foto: Dan Robert Larsen / NRK

Guovtte mánu dassái fitne dálkkádat- ja birasministtar Ola Elvestuen ja stáhtaministtar Erna Solberg Colombias geahččamin mo arvevuvddiid dilli lea.

– Colombias dahket olu mii lea riekta, muhto dilli oppalohkái máilmmi arvevuvddiin lea hirbmat duođalaš.

– Danne ferte vuovddehuhttin bissehuvvot, lohká Elvestuen NRK Sápmái.

Elvestuen lea okta dain olu riikkanjunnožiin geat oassálastet konferánssas.

Norga lea okta riikkain mii lea njunnožis seailluheamen arvevuvddiid. Elvestuen lohká, ahte konferánssat nu mo dat mii dál dollo Oslos lea dehálaš dán oktavuođas.

– Dáppe leat ovddasteaddjit miehtá máilmmi. Ovttasráđiid mii sáhttit soahpat makkár doaibmabijut dárbbašuvvojit vai gájošeimmet arvevuvddiid, čilge Elvestuen.