Sámi artista nominerejuvvon Duiskkas

– Dá lea bálkkašupmi man birra in lean gullan ge

Elin Kåven
Foto: Freddy Ludvik

Elin Kåven goalmmát skearru, «Eamiritni - Rimeborn», lea nominerejuvvon musihkkabálkkašupmái Duiskkas.

«The German Record Critics' Award»-musihkkabálkkašumi jury lea nomineren Kåvena skearru «Traditional Ethnic Music»-oassái, árbevirolaš etnalaš musihkka. Dáinna lea artistta ieš hui duhtavaš:

– Dat gal lea áibbas somá, mun beare njuikon go gullen dien, boagusta son.

Stuora gudni

Leat 157 musihkkaárvvoštalli ja -čeahpi geat leat guldalan ja veardidan geat berrejit oažžu musihkkabálkkašumiid. Bálkkašupmi ii geahča kommersiealla beliid, muhto árvvoštalla fágalaččat musihka.

Dat lea hui stuora gudni, go eai beroš galle skearru don leat vuovdan, nu mo dábálaččat lea, čilge Kåven.

Sámi musihkkárat eai nominerejuvvon Spellemann-bálkkašupmái: – Hui šállošahtti

Vuovdala musihka olgoriikii

Duiska skearrofitnodat Nordic Notes vuovdala Kåvena musihka. Danne lea su goalmmát skearru almmuhuvvon doppe, ja muđui Eurohpás, muhto ii davviriikkain. Sámis gullat skearru loahpageahčen guovvamánu.

Elin Kåven lea álo háliidan olgoriikii, johttit doppe musihkain.

– Mun lean vásihan ahte lea olu suohttaset olgoriikkas.

– Doppe beroštit ja leat sáhkkit, ja guldalit áibbas eará láhkái sámi musihka, go maid mii ruovttus bargat, muitala son.

Loahpageahčen ođđajagimánus juhket bálkkašumiid Duiskkas, ja dalle čielga lei go Kåven buoremus iežas kategoriijas.