Muhtin suohkaniin lea dakkár ortnet ahte addet ruhtadoarjaga skuvlaluohkáide, servviide, organisašuvnnaide dahje eará joavkkuide lágidan dihte sámi álbmotbeaivvedoaluid. Muhto ii dásge leat álo ávki, lea goike eaktodáhtolaččaid duohken.
Dan moaitá nuorra bárdni, Nathaniel Holan Larsen.
Nathaniel lea Áravuomis eret ja muittaša daid áiggiid go su áhkus lei ovddasvástádus lágidit sámi álbmotbeaivvedoaluid Rahkkas.
Muhto go áhkku buohccái, de bázii guoros sadji ja de čuožžilii gažaldat gii lágida sámi álbmotbeaivveávvudeami, ovdalgo Áhkánjárgga suohkan válddii dan badjelasas.
– Eaktodáhtolaččaid duohkái eat sáhte šaddat, suohkanat dat fertejit njunnošii mannat ja bidjat dan suohkanbušehttii, oaivvilda Nathaniel.
Loga dás makkár lágideamit leat Sámi álbmotbeaivve.
Eai gávnna lágideddjiid
Sihke Deanu gielda ja Guovdageainnu suohkan máksiba ruhtadoarjaga sámi álbmotbeaivvi lágideaddjái, muhto dán jagi ii leat oktage dieđihan beroštumi lágidit.
Dássážii eai leat ožžon lágideddjiid, dadjá Frank-Martin Ingilæ, Deanu gieldda ovdánahttinossodaga doaibmajođiheaddji.
Gielda lea máŋgii almmuhan ahte ohcet muhtima lágidit doaluid, muhto ballet ahte korona geažil lea váttis gávdnat lágideddjiid. Dál ii leat go moadde beaivvi vel sámi álbmotbeaivái ja gielddas ii leat vuos čoavddus dasa ja ballet ahte eai šatta ávvudoalut.
Lihka lunddolaš go eará našunálabeaivvi lágideamit
Nathaniel oaivvilda ahte suohkanat galggaše sámi álbmotbeaivve plánet seammá ládje go plánejit Norgga nasunálabeaivveávvudeami.
Almmolaš doalut leat dehálaččat
Sámedikkis ii leat váldi gáibidit ahte suohkanat galget lágidit almmolaš doaluid, muhto sis sáhttá ohcat ruđa lágidit sámi álbmotbeaivvedoaluid, muitala sámediggepresideanta Silje Karine Muotka
Muotka oaivvilda ahte iesguđetge suohkanat fertejit heivehit doaluid movt sidjiide heive, muhto son háliida ahte galgá leat almmolaš čalmmustahttin ja doalut juohke sajis.