Oslo gielda lea aitto mearridan ahte sámi álbmotbeaivvi doalut Oslo ráđđeviesus jagi 2016 rájes galget leat gieldda bistevaš ja jahkkásaš doallun. Mearrádus mearkkaša ahte ovddasguvlui eai dárbbaš ohcamušaid vuođul dohkkehit sámi álbmobeaivvi doaluid lagideami ja ruhtadeami. Nu lea Oslo gieldda áššejođihanlávdegoddi aitto mearridan.
Viiddidan doaluid
Guovvamánu 6. beaivvi lávdegoddi lei evttohan ahte gussiidlohku geat besset sámi álbmotbeaivvi doaluide lasihuvvi 250 - 400:ai. Dugáš dasa lea ahte maŋimus jagiid lea leamašan stuorra beroštupmi searvat iđitborramušaide maid gielda lea fállan ráđđeviesus guovvamánu 6. beaivvi.
Sirdet doaluid
Lávdegoddi cealká ahte ii leat vejolaš buot Oslo sápmelaččaid bovdet iđitborramušdoaluide ráđđeviesus. Áššejođihanlávdegoddi dattetge oaidná dárbbašlažžan viiddidit doaluid vai čáhkket saji eanet sámi mánáide ja váhnemiidda. Viiddideapmi mearkkaša maiddái ahte doaluid šaddet sirdit dálá 2. gearddi festalanjain Ráđđeviessohállii, mii buoremust heive doaluide mas leat ollu mánát.