Iinna ja biras sámesearvi árvala ásahit boarrásiid siidda márkosámiide, Evenášši ja Skánit suohkaniin. Evenášši sátnejođiheaddji, Jardar Jensen mielas dát lea buorre jurdda, muhto ballá, ahte sin suohkanis eai leat ruđalaš návccat ollášuhttit dán ja buoremus livččii, jus earát jođihivčče bálvalusa ja sii de ostet fálaldagaid dárbbu mielde.
- Dat livčče várra buoremus, ahte muhtin váikke eaktodáhtolaš searvi fálašii dákkára, de sii gal áinnas dalle sáhtášedje oastit bálvalusaid, muitala Jensen.
Iinna ja Biras sámiid searvi dat árvala ásahit boarrásiid siidda guovllu sámi boarrásiidda, nu čilge jođiheaddji, Ann-Mari Thomassen.
Ii vel oaidnán árvalusa
Evenášši sátnejođiheaddji, Jardar Jensen dadjá, ahte suohkanis lea dál buorre boarrásiid fálaldat, ja dát ovtta láhkái šattašii ođđa ásahussan. Jensen ii leat oaidnán árvalusa, ja ii dieđe mo sin suohkanstivra boahtá dán meannudit.
Márkosámit Mátta-Romssas ja Nordlánddas leat guovtti suohkanis, Evenáššis ja Skániin. Iinna ja Biras sámesearvvi jođiheaddji, Ann-Mari Thomassen deattuha dehálašvuođa, addit buori fálaldaga sámi boarrásiidda, ja man dehálaš dat lea bisuhit sin lagašbirrasis guhkimus lági miel.
GULDAL:
