Bargobádji lágiduvvo Sámekulturguovddážis Sajosis geassemánu 17.-19. beivviid. ISFI ohcá prošektii guhtta 16-24 –jahkasaš sámenuora, geat leat beroštuvvan buvttadit, čállit ja bagadallat oanehis fikšuvdnafilmmaid sámegillii.
ISFI máksá bargobádjái oassálasti nuoraid idjadeami, boradeami ja mátkegoluid.
Prošeavtta ulbmilin lea buktit nuoraid miehtá Sámi oktii ja addit sidjiide vejolašvuođa juohkit muitalusaid sin iežaset perspektiivvas filmmaid bokte.
Prošeavtta vuosttaš deaivvadeamis nuorat besset ságastallat ja ovttasbargat iežaset filbmaideain, maid ovdánahttit čavčča mielde bargobájis ja bagadallamin gitta válmmaš filmmaide.
Prošeavtta áigomuššan livččii buvttadit golbma oanehisfilmma ja oahpahit ámmátfilbmabargiiguin filbmaráhkadeami ollislaš proseassa ovdábuvttadeamis gitta loahppabuvttadeapmái.
Bargogiella lea sámegiella.
Bargobáji struktuvra
Geassi 2016
Vuosttaš deaivvadeapmi Anáris, filbmaideaid juohkin ja ovdánahttin. Mielde ISFI direktevra Anne Lajla Utsi, hárjánan bagadalli ja Skábmagovat-buvttadeaddji Sunna Nousuniemi oahpaheamen filbma ovdabuvttadeami birra ja addimin rávvagiid mo šaddá buorre filbma sinopsis ja giehtačálus.
Čakča 2016
Giehtačállosiid ovdánahttin - bagádallan
Giđđadálvi 2017
Oanehis filmmaid buvttadeapmi, govvenbáikkiid válljen, neavttáriid casten, filbma govvastruktuvra “cinematography” ja jiena plánen
Oanehis filmmaid filbmen
Loahppabuvttadeapmi: Filmmaid čuohppan ja mix