– Mun lean oalle duhtavaš ja mu mielas lei hui somá vuoitit dákkár bálkkašumi. In lean oppa vuordánge dán, dat lei hui hui somá.
Nu muitala bálkkašupmevuoiti Inger Alette Eira (30), guhte lea vihtta jagi bargan opmodatvuovdin DNBas, Álttás. DNB Eiendomas leat oktiibuot badjelaš 800 opmodatvuovdi, ja beassat daid buoremusaid searvái mearkkaša Eirai olu.
Dovdá sámegiela leat ovdamunnin
Eira vuvddii 106 opmodaga mannan jagi mat ledje sihke Álttás, Guovdageainnus ja Leavnnjas. Bálkkašumi vuoiti oaidná ovdamuniid sámegiela hálddašeamis go barga sámegielat guovlluin gos máŋgii sámásta kundariiguin.
– Dat leat hui olu olbmot geat riŋgejit munnje ja háliidit mu bokte vuovdit iežaset opmodaga, sidjiide lea álkit sámástit ovdalii go dárogiela hállat.
Buoremus rávvagat jus leat oastimin ásodaga
Eira rávve olbmuid váldit oktavuođa opmodatvuvdiin jus áigot oastit ásodaga dahje viesu, vuoi eai gártta bártái. Sii sáhttet veahkehit olbmuid gávdnat dan rievttes viesu.
– Lea hui dehálaš ordnet viessoloana jođáneamos lági mielde, áinnas ovdal viessočájeheami. De lea álkit leat mielde gilvaleames earáiguin. Várre buori áiggi viessočájeheapmái. Lea maid dehálaš lohkat prospeakta, doppe čužžot dehálaš dieđut viesu birra, lohká 30 jahkásaš opmodatvuovdi.
Jus leat gávdnan heivvolaš viesu, de galggat fállat dakkár hatti mii lea oalle láhka dan maid vuovdi lea gáibidan.
– Dalle eai soaitte earát duosttat čuovvulit dahje gilvalit duinna, loahpaha Guovdageaidnulaš, Inger Alette Eira, gii ikte ávvudii go lea bargan Álttá DNBas vihtta jagi.