– Mu mielas lea hirbmat somá čuovvut jiekŋaskearru, ja go mii Suomas eat nu bures birge čuoigamis de ferte geahččat dan mas birge, čilge Eeva Nuorgam.
Miessemánu vuosttaš beaivve álge dán jagi jiekŋaskearru máilmmemiešttirgilvvut Čekkiijas.
Gárigasnjárgga nisu Eva Nuorgam oktan usttibiidisguin leat albma ja duohta jiekŋaskearroberošteaddjit. Nuorgam áigu máilmmemiešttirgilvvuid čuovvut Čekkiijas gitta lohppii miessemanu 17. beaivái.
Sii čuvvot Suoma Ledjoniid ja doivot, ahte dál fas galggašii boahtit golli. Maŋimuš go Suopma vuittii lei jagis 2011.
– Diet golli lea ain buori muittus. Dál doaivut, ahte Suopma fas vuoittášii golli, lohká Nuorgam.
Su mielas ii leat váttis čilget manne jáhkká Suoma dán jagi vuoitit.
– Suomas lea buorre joavku ja mii leat dáppe sin geahččamin.
(Ášši joatkašuvvá gova vuolde)
– Ledjonat gullet mu váibmui
Eeva Nuorgam muitala, ahte son lea máŋga jagi jo sávvan beassat čuovvut jiekŋaskearru máilmmemeašttirgilvvuid. Dán jagi de viimmat heivii.
– Ledjonat leat dušše dakkárat mat gullet mu váibmui. Juohke giđa dušše ferten geahččat mo singuin manná. Ja dát mátki lea munnnje dego dakkár «Once in a life time» dahje oktii eallimis-mátki. Liikká soaitá leat nu, ahte boahtte giđa maid ferte vuolgit, árvala Eeva ja bohkosa.
Makkár riika lea masa Suopma ii heađisge galggašivčče vuoittahallat?
– Dieđusge Norga. Miihan álo vuoittahallat čuoigamis ja spábbačiekčamis, muhto mishan lea jiekŋaskearru ja dat gis lea min hommá, čilge Eeva Nuorgam.
Ikte spelle Norga ja Suopma. Das manai numo álo láve, Suopma vuittii olles 5-0.