Anita Vasara finadii Riskku-kafeas iežas oappáin Leilain mánnodaga, ja sudnuide lea sámeleavga divrras.
– Sámeleavga addá midjiide identitehta ja čájeha earáide geat mii leat, dadjá Anita.
Borgemánu 15 beaivvis juste golbmalot jagi áigi dohkkehii 13 davviriikkaid sámekonferánsa Astrid Båhl sámeleavgga sárguma sápmelaččaid almmolaš leavgan.
Sex, kultuvra ja rock n`roll
– Ja go juo hupmat identitehta birra, de mun gullen máŋga jagi áigi Riddu Riđus muhtuma dadjamen ahte dii sámi nuorat lehpet hui lihkolaččat go dis šaddá sex, kultuvra ja rock n`roll, dadjá Anita.
Olbmot ohcalit unna birrasiid, vai ožžot sierra gullevašvuođa, čilge Anita. Nu gohčoduvvon «sub-kultuvrraid». Sámi biras ii leat nu stuoris ja nu leage sápmelaččain hui buorre dilli. Danin mun liikojin nu movt dát olmmái ođasmahti dan dovddus Amerihká cealkaga.
Earenoamážit liikui dasa go lonuhii narkotihka sáni kultuvrra sániin. Anita lea oainnat álgimen politiijan Guovdageainno suohkanii ja narkotihka ii leat veaháš ge su miela miel.
– Mun illudan ja dat šaddá hui somá, dadjá son.
– Liikon rieggái ovdalii ruossa
Gáfestallamen lei maid multidáiddár Iŋgor Ánte Áilu ja son dulko sámeleavgga ná.
Iŋgor Ántte Áilu Gaup einnosti spáppačiekčamiid bohtosiid.
Foto: Johan Ánte Utsi / NRK– Mun liikon jorbái mii lea gasku. In mun dan gal oaivvil ahte mii leat jorbasat, muhto amma hal lea buoret leat jorbbas ja soddjil go njeallječiegat, dadjá Áilloš.
Guldal eanet dás movt son dulko sámeleavgga. Su maŋŋel gulat maid Vasara oappážagaid.
