Chronic Wasting Disease lea guhka juo beaggán sarvvain, ruksesgottiin ja dál maiddái gottiin. Danin evttoha bargiidbellodaga sámediggeáirras, John Kappfjell ásahuvvot sierra dearvvašvuođabálvalusa mii galgá gozihit bohccuid ja ruksesgottiid dearvvašvuođa. Kappfjell dadjá son vuolggaha dákkár jurdaga earenoamážiid go dávda lea dál maiddái gávdnon guovtti gottis. Dán rádjai lea sáhttán ávkkástallat bohccobierggu, muhto ii vuoiŋŋamaččaid, ađđamiid jna. Dadjá Kappfjell.
Sierra ásahus boazodollui
Dán vuođul son dál vuolggaha jurdaga ahte galggašii ásahuvvot sierra dearvvašvuođabálvalus mas lea earenoamáš ovddasvástádus bohcco dearvvašvuođas, dadjá Kappfjell. Son dadjá boazodoalu dárbbašit sierra ásahusa dahje doaimma mii livččii veahkkin ja doarjjan boazodollui, ja mii maiddái sáhtášii boazoeaiggádiid neavvut, čohkket dieđuid jna. dadjá John Kappfjell.
Ođđa CWD dávda
Kappfjell dadjá ahte galggašii leat stáhtalaš dearvvašvuođabálvalus mas maiddái livččii ovddasvástádus ruksesgottiid obbalohkái. Kappfjell ákkastallá dasa dárbbu ja čujuha ahte dál han lea fuomášuvvon earálágan CDW-virus guovtti ealggas Selbu guovllus. Dát dilli dagaha ahte son ja earáge boazoeaiggádat leat imaštišgoahtán čuožžiluvvon dili, ja dadjá ahte ii oktage dieđe iige sáhte boaoeaiggádiid neavvut maid ja movt sii galget dál láhttet ovddasguvlui.
–Leage juste dát eahpečielggasvuohta mii dagaha dárbbašlažžan ásahit sierra dearvvašvuođabálvalusa boazodoalu ja bohccuid várás, dadjá Kappfjell.
Norgga Boazosápmelaččaid Riikkasearvvi nubbijođiheaddji, Inge Even Danielsen, dajai NRK Sápmái mannán váhkoloahpa ahte CWD sáhttá leat ollu vearrát go maid jagi 1986 Tsjernobyl lihkohisvuohta jus dávda njoammu bohccuide. Kappfjell dadjá CWD dávdda njoammun dagahit ilgadis ja eahpesihkkaris dili earenoamážiid lullisámi boazodollui, mii lea lullisámi kultuvrra guoddi.
Beannotjagi vuordináigi
John Kappfjell muitala ahte dát ođđa CWD dávda lea juo gávdnon guovtti sarvvas, ja dadjá dan mii dagaha dili ovddasguvlui nu eahpečielggasin lea ahte sáhttá mannat sullii 18 mánu ovdal go diehtá ahte leago dávda njommon eará elliide, nugomat bohccuide, dadjá John Kappfjell .
–Dieđusge sáhttá dálá dilli muosehuhttit go ii oktege dieđe maidege dán virus birra, dušše dan ahte dat njoammu earret eará čolgga ja gožža bakte. Ja go vel lea nu ahte ealli vánddarda oalle jođánit ja viidát luonddus, ja go šaddá vuodit beannotjagi ovdalgo diehtá leago dávda njommon, de dilli lea balddihahtti, dadjá John Kappfjell.
Eai dieđe leago njommon
Šibitdoavttirinstituhta fuođđoovddasvástideaddji, Kjell Handeland dadjá ahte áidna vuohki movt iskat bohccuid, lea vuoiŋŋamaččain váldit iskosa, ja dan eai sáhte dahkat ealli bohccuin.
Handeland ii sáhte dadjat ahte leago dát ođđa CWD dávda vuolgán álgo CWD-dávddas, vai leago ođđa.
Son mieđiha ahte sii dihtet hui unnán dan birra. Handeland iige loga sáhte čielgasit duođaštit ahte bohccuide ii leat CWD njommon.