Son guhte lihkostuvvá galgá rámi oažžut. Muhto son gii ii lihkostuva ferte daguidis ovddas váldit ovddasvástádusa, iige geahččalit sivahallat earáid. Nie dat sáhtášii álkit ja oanehaččat neavvut Norgga ráđđehusa eanadoalloministara maŋŋil go dán vahkus fallehii sámepolitihkkáriid, go departemeanta ieš ii leat lihkostuvvan boazodoalu hálddašeamis.
Norgga stáhta dat lea mii hálddaša boazodoalu eanadoallodepartemeantta bokte ja nu dat lea dahkan máŋgalot jagi juo. Ja danne dat stáhta ovddasteaddjit fertejit iežaset ohcii vuos guovlalit, ovdal go earáid fallehišgohtet.
Duorastaga eanadoalloministtar Sámedikki sárdnestuolus giittii daid boazodolliid geat leat čuovvolan maŋemus boazologu geahpedangáibádusa. Gal han giitosa veara livčče siige geat geahpededje boazologu juo vuosttaš gáibádusa vuođul, ja de vel gárte gillát duppalit go hálddašeaddji bijai ođđa gáibádusa, beroškeahttá ahte soapmásat ledje juo čuvvon ávžžuhusa vuolidit boazologu.
Nie jođánit dat lea vejolaš vajálduhttit mii lea dáhpáhuvvan, ja nie álkit sáhttá maid čiehkat iežas eahpelihkostuvvama, ja dan eahperehálašvuođa maid dát dagahii olbmuid guovdu.
Ja jura olbmuin dat leage dás sáhka. Ii fal bohccuin, nugo stáhta ákkastallá. Olbmot dat galget birget boazodoalus, dan ealáhusas mii ii leat dušše ealáhus mii buvttada bierggu, muhto mii lea seammás eallinvuohki ja geađgejuolgi oppa sámi servodahkii.
Eanadoallodepartemeanta lea dovdan dárbbu instrueret boazodoallostivrra. Ja dasa dat sámediggeráđđi reagere go sin áirasat maid bággehallet čuovvut eanadoallodepartemeantta stivrema. Gal han dieđusge lea vejolaš ipmirdit ahte sámediggeráđđi duššástuvvá, muhto seammás go lea váttis dohkkehit eanadoallodepartemeantta áitagiid stivremis boazodoalu, de lea maid váttis ipmirdit ahte sámediggeráđđige galgá áitagiid veagas čađahit iežaset politihka.
Ollugat dieđusge maid oaivvildit ahte boazodoallit leat jeagoheamet go eai čuovo stáhta mearrádusaid. Dat lea maid duohta, ja nu leage boazodoalus alddis maid stuora ovddasvástádus heivehit boazologu dan ektui maid guohtoneatnamat girdet.
Buot buoremus lea jos dat dáhpáhuvvá soabalašvuođain ja buori ipmárdusain hálddašeddjiiguin. Muhto mo dalle go sisabahkkemat gáržžidit boazodoalu eatnamiid - galgá go boazodoallu dalle maid álohii ja agálaččat heivehit iežas doalu, ja boazologu stuoraservodaga geažehis dárbbuid mielde?
Sámediggeráđđi háliida alcces stuorit válddi boazodoalu hálddašeamis ja stivremis. Dan vuolggasajis ahte boazodoallu lea dehálaš álgoálbmotealáhus, ja dan vuolggasajis ahte boazodoallu olahivččii buoret dili, dan vuolggasajis gal sáhttá ipmirdit sávaldaga. Muhto nuppe bealis lea váttis ipmirdit manin Sámediggi háliida váldit stuorit ovddasvástádusa daidda eahpelihkostuvvamiidda, mat Norgga stáhtas leat leamaš boazodoalu hálddašeamis.