Sápmelaččaide lea buoremus ahte Finnmárkkuopmodat eaiggáduššá Finnmárkku eatnamiid, oaivvilda Finnmárkkuopmodaga stivrajođiheaddji Marit Kirsten A. Gaup, gii ovddasta Bargiidbellodaga ja Sámedikki Finnmárkkuopmodaga stivrras.
– Ii sihkarastte sámi kultuvrra boahtteáiggi
Lohkkiidreivves son čállá ahte privatiseret Finnmárkkuopmodaga eatnamiid ii sihkarastte sámi kultuvrra boahtteáiggi, ja dan dihte eai berre gilisearvvit ja eaŋkilolbmot oažžut oamastanvuoigatvuođa Finnmárkkuopmodaga eatnamiidda Finnmárkkus.
– In leat prinsihpalaččat vuostá, muhto Sámis ii leat leamaš kultuvra privatiseret. Jáhkán ahte lea ballu ahte ii beasa šat geavahit guovllu nu go ovdal lea geavahan, jus privatisere eatnamiid.
Eai boazodoalloorohagat eaige siiddatge berre oažžut oamastanvuoigatvuođaid Finnmárkkus, oaivvilda Gaup.
– Eat dieđe geat boahtteáiggis lea boazodoalus, ja makkár olbmot dalle leat. Mun háliidan ahte galggašii leat nu movt dál lea, ahte geavahanvuoigatvuohta lea nanus, muhto ahte FeFo eaiggáduššá eatnama.
– Lea hui ártet gal
Gaup lea dattetge ovttas iežas orohaga boazodolliiguin gáibidan oamastanvuoigatvuođa orohaga giđđa-, čakča- ja dálveguohtumiidda Kárášjogas.
Son lea ieš boazodoalli orohat 16:s, ja lea maid stivrras. Dát orohat lea ovddidan gáibádusa Finnmárkku kommišuvdnii, gos gáibidit orohaga boazodolliide oktasaš oamastanvuoigatvuođa giđđa ja čakča ja dálveguohtuneatnamiidda Kárášjogas.
– Jahkečoahkkin dat lea cealkán ahte sii háliidit eaiggátvuođa. Dál leat juste bargamin Kárášjoga-guovlluin, ja sii oidnet man olu eaiggátvuođagáibádusat leat sáddejuvvon sisa daidda guovlluide gos mii leat.
Gaup mieđiha ahte lea ártet gullat ahte son lea ieš mielde gáibádusa ovddideamis, go lea ieš vuostá priváhta eaiggátvuhtii.
– Lea hui ártet gal, muhto lea goit šaddan nu go lea šaddan, go buohkat ohcet dál eaiggátvuođa. Orohat 16 lea gáržžahallan ja ferte dahkat seamma, lohká Gaup.
