Olmmáivákki historihkkár, Harry Solhaug, ballá sámegiela oalát jávkamin. Dál ferte bargagoahtit ealáskahttit giela mánáidgárddiin ja skuvllain, lohká Romssa fylkamánni Bård Pedersen.
Ii gullo šat sámegiella gávppiin ja eará báikkiin
Historihkkár Harry Solhaug muitala ahte guoktelogi jagi dás ovdal gullui sámegiella nugo gávppiin ja eará lunddolaš deaivvadanbáikkiin. Muhto sámegiela dilli rievddai logi jagis, ja ii bálljo gullon šat giella, lohká Solhaug. Dál gal lea vel vearrát dilli. Solhaug sávvá ahte váibmogiella ealáska fas, ja sávvá ahte eanet návccaid biddjojit mánáide ja nuoraide oahppat sámegiela.
Romssa fylkamánn, Bård Magne Pedersen, gii lea jođihan NOU 2016:18 "Váibmogiella"
-raportabarggu, lea ovttaoaivilis Solhaugain ahte dál ferte deattuhit sámegiela ealáskeami mánáid ja nuoraid gaskka. Danne lea Pedersen mielas bidjat návccaid goit erenoamážit mánáidgárddiide ja skuvllaide.
Nuorat bukte hástalusaid
Olmmáivákki 10. luohká oahppi, Sajane Olsen, logaldalai semináras, ja sus gal ledje čielga hástalusat Gáivuona suohkanii. Sii dárbbašit čoahkkananbáikkiid gos lea vejolašvuohta sámástit. Dasa lassin evttoha Olsen ahte suohkan ferte bargat oččodit eanet skuvlamánáid válljet sámegiela vuosttaš giellán.
Lea maid dehálaš ahte nuorat besset mátkkoštit sámegielat báikkiide, gos sáhttet ságastallat sámegillii. Suohkan berre gokčat dákkár goluid nuoraide, lohká Sajane Olsen. Gáivuona sátnejođiheaddji Svein Leiros logai semináras ahte dákkár giellaáŋgirdeaddji go Sajane Olsena, áigu suohkan doarjut nugo giellamátkkiide.
Maid berre suohkan bealis dahkat ealáskahttit váibmogiela
Sámi giellasiidda bargi, Ane-Alis Vatne Johansen, bivdá suohkana mearridit ahte Goržži mánáidgárddis galgá ovtta ossodagas leatsámegiella váldogiellán. Su sávaldat lea maid ahte Sámedikki Sámás mánáin -giellaávžžuhusdoaibma váldo atnui. Dasa lassin ahte suohkan hukse dahje hábme sámi profiilaskuvlla Gáivutnii.
Gáivuona ráđđeolmmá, Einar Pedersen lohká ahte suohkana bealis fertejit earret eará geahččat mo hálddašit guovttegielalašvuođa ruđaid boahtte áiggis, leago dárbu rievdadit dálá geavaheami.