- Lea hui illudahtti go Sámediggi doarju árktalaš eanandoalu, lohká Finnmárkku Boanddaid searvvi jođiheaddji Grete Liv Olaussen.
Sámediggi doarju árktalaš eanandoalu miljovnnain. Dát lea oassi eanadoallošiehtadusas. Prošeakta bistá golbma jagi ja das sáhttet eanandoallodutkit, boanddat, ja earát geat áiggošedje ovdánahttit eanandoalo davvin, ohcat ruđa Fylkkamánnis. Dál lea prošeavtta nubbi jahki.
Maŋimuš jahki
Muhto ráđđehus lea mearridan ahte eai atte šat Sámedikki háldui ruđaid eanandoalu investeremiid várás.
Sámediggeráđi Silje Karine Muotka lohká eanandoalu sámis dehálažžan, muhto ballá ahte dán jagi maŋŋá eai sáhte šat doarjut eanandoalu.
- Mii ballat dan ahte dát jahki sáhttá leat maŋimuš jahki go mis lea vejolašvuohta doarjut oktasaš árktalaš eanandoalloprošeavtta. Nu lea dan dihtii go eanandoallodepartemeanta lea sihkkon eret dan juolludeami fylkkagildii ja Sámediggái. Mii šállošit dan dieđusge, dadjá Muotka.
Olusat leat heaittán
Finnmárkku Boanddaid searvvi jođiheaddji gal sávašii ahte Sámediggi boahtte áiggis maid doarju eanandoalu.
- Mun sávan ahte Sámediggi ain juolluda dan maid suittet, vaikko obbalaš submi šattašii unnit, lohká Olaussen.
2007 rájes leat viđa jagis 61 Finnmárkku boandda heaittán eanandoaluin. Dat dahká 15,8 proseantta ja lea nubbin eanemus olles riikkas. Romssas leat dán viđa jagis heaittán eanemus boanddat eanandoalus, olles 18,79 proseantta.