Sámedikki bušeahtta: Ealáhusat ja politihkkárat leat vuoitit

• Les saken på norsk

Runar Myrnes Baltos lea leamašan dušše guokte vahku gárvvistit 2022-sámediggebušeahta.

Ja son ferte vuos álggos čuovvut dan maid ráđđehus lea evttohan Norgga stáhtabušeahtas. Dan almmuhii finánsaministtar Jan Tore Sanner golggotmánu 12. beaivve .

– Leamašan hástaleaddji, muhto dieđusge maiddái somá, dadjá Myrnes Balto NRK:i.

Sus lea politihkalaš ovddasvástádus ruhtadit Sámedikki doaimmaid.

Dá lea su bušeahtta árvalus oanehaččat čájehuvvon:

NRK čilge

Dá lea Sámedikki bušeahtta

Bláđe viidáseappot

Sii stivrejit ruhtageavaheami

Sámediggeráđi sáhttá sulastahttit ráđđehusain.

Ja ráđđi dat vuos evttoha mo ruđat, mat bohtet Stuorradikkis, galget geavahuvvot.

Ráđi «finansaministtar»

Biennáš Elle Elle Eliasa Runar:s (34) lea bušeahtta ovddasvástádus.

Ovddidit sámi servvodaga

Ruđain, maid ráđđehus ja Stuorradiggi juolluda, háliida Sámediggi ovddidit olles sámi servvodaga.

Sámediggi mearrida ieš masa ruđat galget geavahuvvot.

Ja ruđat geavahuvvojit dáid doaimmaide:

• Politihkalaš doaibma
• Hálddahusa doaibma
• Doaibmabijut, ovdamearkka dihtii giella, máhttu, ealáhusat ja kultuvra

576.685.000 kr

2022 várás lea ráđđehus evttohan 576.685.000 kr Sámediggái.

Hálddahus ja politihkka

• Sámedigge hálddahusdoibmii lea evttohuvvon 144.899.000 kr. Dát lea 25 proseantta dan ruđas maid Sámediggi oažžu. Juohke njeallját kruvndu manná hálddahussii.
• Politihkalaš doibmii fas 33.512.000 kr. Dát lea 5,8 proseantta dan ruđas maid Sámediggi oažžu.

398.274.000 kr eará doaimmaide

• Njuolgadoarjja earáide: 247.951.000 kr. Dát lea 43 proseantta olles bušeahtas.
• Doarjagat maid olbmot sáhttet ohcat: 97.185.000 kr. 16,8 proseantta olles bušeahtas.
• Šiehtadusat (duodji, dáida, oahponeavut, sámi giellagáldu): 31.625.000 kr. 5,5 proseantta olles bušeahtas
• Prošeavttat: 20.363.000 kr. 3,53 proseantta olles bušeahtas.
• Konferanssat ja árvvoštallan: 1.150.000 kr. 0,20 proseantta olles bušeahtas.

Mearrida

Dievasčoahkkin meannuda ja dohkkeha bušeahta skábma- dahje juovlamánus juohke jagi.

Oažžugo Sámediggi beare unnán ruđa ráđđehusas ja Stuorradikkis?

Jo

Jo

80%

Ii

Ii

20%

Doarvái

Doarvái

0%

15 stemmer

Forrige kort

Sámediggi

Neste kort

– Sámi ásahusat eai galgga gillát

Stuorradikki válgabohtosa geažil, de lea Norggas ođđa ráđđehus.

Vuossárgga almmuhii Bargiidbellodaga-Guovddášbellodaga ráđđehus iežaset stáhtabušeahta, muhto Sámedikki ruhtadeapmi ii earáhuvvan dan ektui maid Solberg-ráđđehus jo lei evttohan.

– Stuorámus hástalussan lea haddegoargŋun. Mii eat oaččo buhtaduvvot dan, čilge Elle Elle Eliasa Runar.

Haddegoargŋun mearkkaša ahte 2021-kruvnnus lea unnit árvu 2022:s. Dat mii dán jagi máksá 100 kr, máksá boahtte jagi 102,40 kr.

Ráđđehus árvvoštallá ahte haddegoargŋun šaddá 2,4 proseantta. Muhto Sámedikki bušeahtta ii lassán eanet go 1,6 proseanttain.

Sámediggeráđđi lea dattetge evttohan ahte buohkat geat ožžot njuolggodoarjaga Sámedikkis, ožžot dan veardde ruđa mii maid čuovvu haddegoargŋuma.

– Mii háliidat ahte sámi ásahusat eai galgga gillát dan dihtii go stáhtabušeahtas ii lasihuvvo ruhta. De mii addit sidjiide 2,4 proseantta lasáhusa min bušeahtas, dadjá Myrnes Balto.

Dát vuoruheapmi fas čuohcá earáide ja eará doaimmaide.

– Dalle šaddá unnit ruhta earáide geat ohcet doarjagiid Sámedikkis. Nu lea leamašan dilli máŋga jagi jo, ja min vejolašvuođat doarjut prošeavttaid šaddá unnit ahte unnit. Dán hástalusa lean aiddo čilgen Stuorradikki gielddalávdegoddái, muitala sámediggeráđđi.

Bođii eanet ruhta ealáhusaid

Muhto Sámedikki bušeahtas lea maid buorit bealit, dadjá Myrnes Balto.

Ráđđehus dieđihii geassit ahte háliidit nannet ealáhusvuođu sámi báikegottiin. Dán oktavuođas ráđđádalai Sámediggi ráđđehusain, ja fidnii nu 6 miljovnna stáhtabušeahta bokte.

– Dát mearkkaša ahte mii lihkus sáhttit lasihit doarjagiid ealáhusaide. Fitnodagat, mat leat huksemin doaimma, sáhttet oažžut eambbo ruđa. Dát lea maid mielde nannemin ássama ja ealásis sámi báikkiid. Ja dáin fitnodagain barget maid nuorat, dadjá Elle Elle Eliasa Runar.

– Dárbu eanet politihkkáriidda

Sámediggeráđđi vuoruha maid čielgasit politihkalaš doaimmaid. Earet eará lea virgádan vel ovtta ráđđeaddi, nu ahte dál leat oktiibuot golbma ollesáiggi ráđđeaddi.

Dása lea biddjon eanet ruhta.

– Jus mis oppanassiige galgá leat vejolaš váikkuhit ráđđehusa ja Stuorradikki, ovdamearkka dihtii luvvet eanet ruđa sámi servvodahkii, de lea dehálaš ahte mis leat olbmot geain lea kapasiteahta bargat dáinna, čilge Myrnes Balto.

Vaikko dán geažil sáhttet boahtit moaitagat álbmogis, de dadjá son ahte vuoruheapmi lea dárbbašlaš.

– Mun sávan ahte boahtte jagi jo oaidnit bohtosiid dán vuoruheamis. Sávvamis oažžut ovdan sámi servvodaga dárbbuid nu ahte ođasmahttojuvvon 2022-stáhtabušeahtas jo boađášii eanet ruhta, dadjá sámediggeráđđi.

Measta 400 miljovnna servvodahkii

Boahtte jagi manná 398.274.000 kr Sámedikki bušeahtas iešguđetlágan doaimmaide.

Dat lea njuolggadoarjagat organisašuvnnaide ja ásahusaide, iešguđetlágan ohcanvuđot doarjjaortnegat, šiehtadusat, prošeavttat, konferánssat ja evalueremat.

Gielladoaimmaide evttohuvvo 113.111.000 kr

Bajásšaddan, oahpahus, máhttu ja dutkan: 62.023.000 kr.

Areálat, biras ja dálkkádat: 3.583.000 kr

Ealáhusat: 38.203.000 kr

Kultuvra: 158.125.000 kr

Kulturmuitosuodjaleapmi: 3.064.000 kr

Dearvvašvuohta ja sosiála: 2.809.000 kr

Álgoálbmogiid vuoigatvuođat, riikkaidgaskasaš bargu ja dásseárvu: 2.740.000 kr

Ovttasbargošiehtadusat: 2.500.000 kr

Eará doaibmabijut: 12.116.000 kr

Ná lea Sámedikki bušeahtta ovdánan 2018 rájes.

• Geahčas dán vel: Hvor mye kan du om Sametinget?