NRK Meny
Normal

Vuordá 48 miljovnna lassáneami

Sámediggeráđđi vuordá 48 miljovnna ruvnno lassáneami sámi doaimmaide go dán vahku deaivvadit Stuoradikki ovddasteddjiiguin.

Ann-Mari Thomassen

Sámediggeráđđi, Ann Mari Thomassen vuordá Stuoradikki lasihit doarjagiid sámi doaimmaide.

Foto: Dan Robert Larsen / NRK

Sámediggeráđđi lea dan vahku deaivvadeamen Stuoradikki lávdegottiiguin ja áirasiiguin, ja vurdet olahit 48 miljovnna ruvnno lassáneami sámi doaimmaide 2016 stáhtabušeahta bokte. Jagi 2016 stáhtabušeahtta lea lassánan 2,6 proseanttain 2015 stáhtabušeahta ektui, muhto juolludeapmi sámi doaimmaide lea njiedjan 3,4 proseanttain.

– Mii eat ipmir manin juolludeapmi sámi doaimmaide ii lassán nu movt eará doaimmaide, dadjá Sámediggeráđđi, Ann Mari Thomassen.

Stuorradiggi rihkku ovttasbargošiehtadusa

Ruhtajuolludeami njiedjan sámi doaimmaide lea dagahan ahte Sámediggeráđđi dál geahččala čoahkkinastit sihke Stuoradikki lávdegottiiguin ja áirasiiguin.

– Mii maiddái áigut ságastallat Gaske-Nøørjen Samienskovle, danin go ráđđehus rihkku ovttasbargošiehtadusa go stáhtabušeahtas árvalit heaittit sámeskuvlla, dadjá Thomassen.

Gaske-Nøørjen Samienskovle Árbordes lea okta dain deháleamos gáiddusoahpahusfitnodagain, mii fállá lullisámegielat oahpahusa.