NRK Meny
Normal

Sámediggi lea njulgen čieža miljon ruvdnosaš vuolláibáhcaga

Sámediggeráđđelahttu Ann-Mari Thomassen (NSR) lea ilus go Sámediggi lea nagodan njulget guovtti ovddit jagi vuolláibáhcaga.

Sametingsplenum

Sámediggi lea guokte manŋimuš bušeahttajagi rahčan vuolláibáhcagiin. Dál lea dát njulgejuvvon.

Foto: Berit Nystad / NRK

Ann-Mari Thomassen

Sámediggeráđđelahttu Ann-Mari Thomassen (NSR).

Foto: Mette Ballovara / NRK

– Dát lea leamaš gáibideaddji bargu mii lea dahkkon guovtti bušeahttajagis. Sámediggi lea unnidan váikkuhangaskaomiid politihkalaš ja hálddahuslaš dássái. Ohcanvuđot váikkuhangaskaomiin lea badjelbáza ortnegiin giella, máhttu ja ealáhusat, eará láhkai geavahuvvon vuolláibáhcaga njulgemii, čilge Thomassen preassadieđáhusastis.

Sámedikki čoggon vuolláibáhca lei oktiibuot 6.969.773 ruvnnu.

Loahppavuolláibáhca 256.379 ruvnnu

Sámediggi ovddida dál ođastuvvon bušeahtas evttohusa loahppavuolláibáhcaga ektui, mii lea 256.379 ruvnnu ovdalgo dat lea balánssas.

Vuolláibáhcaga leat evttohan njulget nu ahte geahpedit ohcanvuđotdoarjaga ealáhusaide ja fitnodatovddideapmái.

– Sámedikki jagi 2014 bušeahttamearrádusas lei eahpečielggasvuohta Deanu ja Várjjaga museasiidda poasttain, kulturviesuid ja museaid ektui, čilge Thomassen.

Goappašagat poasttat gullet dattetge Deanu ja Várjjaga museasiidii, ja Sámediggeráđđi evttoha ahte dat čilgejuvvo 2015 ođastuvvon bušeahtas.

Sámediggi láve ođastit bušeahta jahkásaččat geassemánu dievasčoahkkimis, njukčamánu jahkedieđáhusmearrádusa vuođul, mas maiddái lea mielde jahkerehketdoallu.