Nissonfierpmádagat ohcalit eanet árvalusaid

Goappaš sámi nissonfierpmádagat cuiggodit Sámedikki go ii álggat baicca konkrehta doaimmaid eastadan dihte veahkaválddálašvuođa Sámis.

Laila Somby Sandvik (t.v), Gudrun Lindi Eriksen

II LEAT DOARVÁI: Sámi NissonForuma stivrralahttu Gudrun Lindi oaivvilda ahte seminárat ja fágabeaivvit eai leat doarvái.

Foto: Sergey Gavrilov / Gavrilov Media

Boahtte jagi bušeahtas juolluda Sámediggi badjel beali eambbo ruđa dásseárvvu loktemii diimmá bušeahta ektui. Sii juolludit 350.000 ruvnno semináraide ja fágabeivviide bargat seksuálalaš ja eará veahkaválddálašvuođaiguin, mat gevvet sámi servodagas.

Sii áigot nai lágidit riikkaidgaskasaš nissonkonferánsa Sámis.

Sámi NissonForum (SNF) cuiggoda dan.

– Min mielas galggašii álggahuvvot konkrehtalaš bargu, mii sáhttá buktit čovdosiid, iige dušše semináraid lágidit, dadjá SNF stivrralahttu Gudrun Lindi.

Gudrun Eliissá Eriksen Lindi

OAHPAHIT RÁJÁIDBIDJAMA MÁNÁIDE: SNF háliida ahte mánát galget rájáidbidjama birra oahppat vuođđoskuvlla rájes.

Foto: Torgeir Varsi / NRK

Son oaivvilda ahte galggašii baicca álggahuvvot sámi heahtedilleguovddáš. Doppe livččii gelbbolašvuohta sámi servvodaga ja kultuvrra birra.

Juohke viđat nissonolmmoš gillán

Saminor 2 dutkan čájehage ahte okta viđa sámi nissonolbmos lea gillán veahkaválddálašvuođa. Dutkan čájeha maiddái ahte sámi nissonolmmoš vásiha dávjjit seksuálalaš veahkaválddálašvuođa go muđui nissonolbmot seamma guovllus.

Sámis leat guokte nissonfierpmádaga mat oažžuba ruhtadoarjaga njuolga Sámedikkis, SNF ja Sáráhkká nissonfierpmádat. Maiddái Sáráhkká nissonfierpmádagas ohcalit eanet daguid.

– Sávan ahte eai šatta dušše sánit ja dasa de nohká. Dat ferte boahtit juogalágan boađus dáin seminárain, dadjá Sáráhkká preassadieđiheaddji Berit Louise Eira.

Goappaš fierpmádagat leat lágidan semináraid ruđa ovddas man Sámediggi juolluda.

Ii čoavdde servodatváttisvuođa

Sámedikki ráđđelahttu Mikkel Eskil Mikkelsen muitala ahte sii eai oaivvil ahte dát ruhtajuolludeapmi čoavddášii sámi servvodaga hástalusaid.

– Muhto mii oaivvildit ahte seminárat ja deaivvadeamit, gos mii beassat digaštallat, leat dehálaččat, dadjá Mikkelsen ja lasiha:

Maiddái lea hui dehálaš guorahaddat veahkehanásahusaid, sin veahkis ii leat olus ávki jus dárbbašeaddji ii luohte sidjiide. Ja dalle lea dárbu veahkeheddjiide diehtit maid fertejit oahppat.

Mikkel Eskil Mikkelsen

GALGÁ ČALMMUSTAHTTIT: – Sámediggi galgá leat mielde čalmmustahttimin sámi servvodaga hástalusaid, dadje sámediggeráđđi Mikkel Eskil Mikkelsen.

Foto: Tor Egil Rasmussen / NRK

Sámediggi gáibida eanet dihtomielalašvuođa veahkaválddálašvuođa fáttá birra. Sii áigot bidjat fokusa fáddái nationálalaččat ja riikkaidgaskasaččat.

– Mii doallat oktavuođa veahkehanásahusaiguin ja dearvvašvuođabálvalusaiguin ja váruhat ahte sii dustejit álbmoga ja huksejit luohttámuša álbmogii, dadjá Mikkelsen.

Loga dán maid: Áiggoše rabasvuođa veagalváldima birra