Háliidivččii dovddus animašuvnnaid sámegillii

– Hirbmat buorre. Min mánát dárbbašit gullat gielaset áigeguovdilis buvttademiin mat geasuhit sin, dadjá Kare Raija Anti.

Nuorra sámenisu orru Oslos.

Sutnje lea stuorra hástalus mánáidasas oahpahit sámegiela almmá dan veahki haga maid animašuvdnafilmmat attášivčče.

– Dutkan čájeha, ahte ovdamearkka dihtii fránskalaččat geat fárrejit eará riikkaide ii leat váttis mánáidasaset oahpahit fránskagiela. Sis han leat mearihis olu filmmat iežaset gillii. Nu ii leat sámemánáin, čilge Anti.

• Loga maid: Eadneolmmoš: – Suovašin mánáidan eanet iPadain jus livčče eanet sámegiel áppat
• Loga maid: Deanu politihkkárat: Buot skuvlamánát galggešedje oahppat sámegiela

Guokte miljon ruvnnu «Jikŋon 2» filbmii

Norgga, Ruoŧa ja Suoma sámedikkit ja Sámiráđđi leat ovttasbargan ovtta máilbme stuorámus mediijafitnodagain, Walt Disney Animation Studios.

Ovttasbarggu olis lea Disney ráhkadan sámegiel veršuvnna dovddus filmmas «Frozen 2».

Disney Norge logut čájehit, ahte Norggas leat vuvdon 4242 kinobileahta. Dasa lassin lea «Jikŋon 2» čájehuvvon Suomas, Ruoŧas ja rávdnjenbálválusain.

Norgga sámediggedirektevra, Rune Sverre Fjellheim, oaivvilda sii leat ožžon stuorra ávkki dan guokte miljon ruvnnus mii dása lea geavahuvvon.

– Mii lea sámemánáide addán stuorra ilu. Sii leat ožžon alladásat animašuvdnafilmma iežaset gillii. čilge Fjellheim.

Ruđat leat geavahuvvon mátkiide, čoahkkinastimii ja šiehtadallamiidda Disney-fitnodagain dan oktavuođas go leat sihkkarastán «Frozen 2» animašuvnna kvalitehta.

– Min ovddasvástádus álbmotválljen orgánan lea bealuštit sámi beroštumiid, čilge Fjellheim.

• Loga maid: Deanu-Máijá navdui spiovdnan go báhtarii duiskka soalddáhiin

– Eanet filmmat sámegillii

Kare Raija Antis lea hástalus NRK Sápmái.

– Dii berrebehtet geavahit eambbo ruđa oastit vuoigatvuođaid áigeguovdilis tv-buvttademiide, maid de sáhttibehtet jorgalit sámegillii, evttoha Anti.

Son namuha earret eará Peppa spiidni, Sam dollačáskadeaddji ja Paw Patrol.

NRK Sámi direktevra Mona Alette Solbakk rámida dán konstruktiivvalaš evttohusa.

– Hirbmat dehálaš ahte sámi fálaldaga lea álki gávdnat ja ahte geahččit válljejit dan. Jus dovddus animašuvnnaid dubben oaččošii eanet mánáid sámástit, de lea dát buorre jurdda, dadjá Solbakk.

– Ii dárbbaš leat sápmelaččaid birra

Áiggi mielde leat maid ráhkaduvvon buori animašuvdnafilmmat eamiálbmogiid birra ja maid eamiálbmogat ieža leat buvttadan.

Earret eará kanadalaš «Molly of Denali», Netflix «Pachamama», amerihkkálaš «Victor and Valentino» ja australiijalaš «Little J and Big Cuz».

– Buot filmmat sámegillii eai dárbbaš leat sápmelaččaid ja eamiálbmogiid birra. Dákkár muitalusat soitet leat apmasat máŋgga sámemánnái gávpogiin. Danne lea mávssolaš dubbet dovddus ráidduid sámegillii, ákkastallá Anti.

Solbakk oaivvilda dá lea buorre muittuhus.

– Midjiide lea mávssolaš muitalit muitalusaid mat leat nu buorit, ahte olbmot háliidivčče geahččat daid. Mánát leat rántot. Sii eai gille geahččat juoga mii sin mielas ii leat buorre, muittuha Solbakk.