Borgemánu 28. beavvi dolle hutkanbeaivvi Kárášjoga joatkkaskuvlla ohppiid várás. Dál leat álggahan entreprenevraprošeavtta, ja dasa oassálastet golmma oahppoprográmma oahppit, namalassii Media ja gulahallama, Huksen- ja rusttetteknihka, ja Teknihkka ja industriála buvttadeami oahppit.
Oahppit álge hutkat fitnodagaid
Foto: Randi Gj. VorrenJagis galget bargat nuoraidfitnodagaiguin. Lea Ungt entreprenørskap Finnmark gii kurse sihke ohppiid, oahpaheddjiid ja eará skuvlabargiid dán oktavuođas. Sii ovttasbarget maiddái Kárášjoga vuođđoskuvllain.
Randi Gjevestad Vorren lea beaivválaš jođiheaddji, ja sutnje lei hui gelddolaš oahpásmuvvat nuoraide.
– Mii leat áibbas oadjebasat dasa ahte lihkostuvvet joatkkaskuvllas, go leat buorit ovttasbargoguoimmit, nanu oahpaheaddjit ja movttegis oahppit. Mii illudit oaidnit bohtosiid, loahpaha Vorren.
Sávvá oaidnit ruoná fitnodagaid
Sámediggeráđđi juolludii 350 000 ruvnno nuorra Finnmárkku entreprenevrraide. Ungt entreprenørskap Finnmark ja sámi suohkanat galget ovttas atnit dáid ruđaid skuvlaohppiide, geat háliidit álggahit fitnodaga.
Sámedikkiráđi miellahttu, Ann-Mari Thomassen
Foto: Randi Gj. VorrenSámediggeráđđelahtus Ann-Mari Thomassenis lea doaivva ahte šaddet fitnodagat, ja sávvá ahte nuorat oidnet riggodaga mii lea sin birra.
– Dappe gávnnat olu buriid resurssaid, sávan mii oažžut nuoraid oaidnit mii lea buorre Kárášjogas. Dáppe lea olu luossa ja meahcci. Soaitá soames dál jurdila maid sáhtášeimmet bargat dainna mehciin, lohka Thomassen.
Hutkás oahppit
Kárášjoga sátnejođiheaddji Anne Toril Eriksen Balto maid lei boahtán oaidnit go oahppit bargagohte prušeavttain.
Sus lea jáhkku mánáid ja nuoraid hábmennávccaide, ja lea buorre go besset vásihit mo galgá fitnodaga álggahit.
– Háliidit oažžut sin oaidnit ahte dát ii leat nu váttis. Mun jáhkán dát lávki geahppu, ahte ii leat nu váttis ja lossat, go olmmoš lea beassan vásihit mii fitnodatálggaheapmi oppalohkái lea, lohká son.
Hábmegohtet neahttasiiddu
Njeallje oahppi ledje jo searválagaid álgán jurddašit makkár fitnodaga sii sáhtášedje álggahit.
– Mis leat hui stuora vuordámušat. Sávan mannat bures ja ahte mii lihkostuvvat, čilgesta joatkkaskuvllaoahppi Elen Marianne Eira.
Kárášjoga joatkkaskuvlla oahppit
Foto: Randi Gj. VorrenSii dihtet makkár fitnodaga sii háliidit álggahit, muhto eai sáhte vuos muitalit nu olu.
– Lea hui stuora neahttasiidu maid mii galgat váldit badjelasamet, ja dan galgat hábmet iežamet jurdaga mielde, lohka Johan Biti.
Neahttasiidduin fállet sihke bálvalusaid ja buktagiid.
Dis lea fitnodatjurdda oalle čielggas?
– Jo, jo, jo! Dál lea dušše vuordit ahte mii oažžut lobi, de mii álgit, mojohallá Biti.
