Sámediggi šálloša ja rievdada njuolggadusaid FAS

– Mun háliidan dás álggus šállošit go sámi lágadusat fertiije ieža gávdnat lassi ruhttadeaddjit. Mii oaidnit dál Sámedikkis ahte diet rievdadus ii livčče galgat bidjot sámi girjjalašvuhtii, nie dadjá sámedikki ráđđelahttu Henrik Olsen Árdna tv-sáddagis mii sáddejuvvo mánnodaga.

Sámediggi lea ovdal ollasit ruhttadan sámegielgirjjiid, muhto 2015 rievdadedje njuolggadusaid nu ahte lágadusat fertiije ieža máksit 20 proseantta girjebuvttadeamis.

Muhto dál jorgala Sámediggi áššis ja ruhttadišgoahta fas ollasit sámegielgirjjiid.

– Mii oaidnit ahte lágadusain ii leat oba vejolaš ge gávdnat eará ruhttadeaddjit, dadjá Olsen.

– Unnán gánnáhahtti

Čálliidlágadusa hoavda John Trygve Solbakk muitala ahte sámi girjjiguin ii diine lágadus go leat beare unnán lohkkid.

– Sámi girjjit mii jođihat nu unnán ahte das ii boađe dienas. Nu lea álohii leamašan, danne lea Sámedikki doarjja áibbas dárbbašlaš jus sámi girjjit galget ain gávdnot boahtte áiggis, dadjá Solbakk.

Nuorat eai loga girjjit

Árdna lea maid jearahallan moadde sámi nuora, ja sii eai gal loga sámi girjjiid.

– Mun lean ovtta sámi girjji lohkkán maŋŋel joatkaskuvlla, dan mun ožžon riegadánbeaiskeaŋkkan, dadjá 19-jahkásaš Ánne Kátjá Gaup.

– Mun in leat lohkkán ovttage girjji maŋŋel joatkaskuvlla gos dieđusge fertejin lohkkát muhtun sámi girjji skuvlabargguid dihte, nu dadja 20-jahkásaš Ellen Marianne Gaup.

Čálla sámegiela dihte

Ártna studioi boahtá maid girječálli Rauni Magga Lukkari, son gohčoda iežas idealistan, dakkár guhte ii diine gal muhto čálla sámegielgirjjiid seailluhan dihte sámegiela.

– Veahaš gal lea unohas gullat ahte nuorat eai loga girjjit, mun balan giella jávka, muhto gal hal máilbmi manna viidaseappo dan dihte, dadjá Lukkari.

Muđui lea Árdna finadan Sisa nammásaš kulturguovddažis Álttas. Guovddaš lágida deaivvademiid olbmuide geain leat iešguđet ge lagan duogažat. Deaivvadeamit galget nannet dahje buoridit olbmuid dearvvašvuođa.

Geahča Ártna NRK2 mánnodaga diibmu 2045.