Sámediggeráđđi: – Álkit leat homofiilla Sámis

Badjel čuođis serve Sápmi Pride vázzimii čađa Kárášjoga márkanbáikki lávvordaga. Sámediggeráđi mielas dát čájeha ahte Sámis ge leat unnit ovdagáttut homofiillaide.

Henrik Olsen på Sápmi Pride

Sámediggeráđđelahttu Henrik Olsen lea rámis go Sámediggi lea mielde nannemen sámi homofiillaid ja lesbbaid dili.

Foto: Jan Roger Østby / Sametinget

– Sámis vuhtto eanet rabasvuohta homofiillaid ja earáid ektui geat leat veahá eará láganat, ja dán barggus leat doalut nugo Sápmi Pride áibbas dárbbašlačča, lohká sámediggeráđđelahttu Henrik Olsen.

Ivdnejuvvon vuovttaiguin, gávttiiguin ja dieđusge beakkán arvedávgeleavggain ledje Sápmi Pride oasálastit čalbmáičuohcci Kárášjoga čoahkkebáikkis lávvordaga.

Duppal rasisma

Vuosttas geardde dat lágidedje sámi homofiillat, lesbbat, guovtteseksualat, transvestihtat ja queer:at dákkár doaluid Norgga beale Sámis.

Sin lagamuččat ja earát ge geat háliidedje čájehit iežaset doarjaga sámi homofiillaide, ledje mielde Sápmi Pride vázzimis.

Sámediggeráđđelahttu Henrik Olsen lea ilus go Sámis ge orru šaddamen leat álkit eallit homofiilan ja lesban.

– Mii galgat muitit ahte sii dávjá leat gártan gierdat badjelgeahččama sihke danne go leat sámit ja homofiillat , danne lea buorre oaidnit ahte nuorra sámi homofiillain ja lesbbain lea nannosat iešdovdu, lohká Olsen.

Lohpida doarjaga

Sámediggi lea Sápmi Pride váldo ruhtadeaddji ja Olsen maid lohpida Sámedikkis ruđa boahtteáiggis ge sullasaš doaimmaide main lea ulbmil nannet sámi homifiillaid ja lesbbaid dili.

Sámediggi lágida maid vuossárgga seminára čalmmustahttin dihte sámi homofiillaid, lesbbaid, guovtteseksualalaččaid, transvestihtaid ja queer:aid hástalusaid ja dárbbuid dálá servvodagas.

Henrik Olsen sammen med Sápmi Pride deltakere.

Henrik Olsen ja Sápmi Pride oasálastit ledje duhtavačča go badjel 100 olbmo serve Pride-vázzimii Kárášjogas.

Foto: Jan Roger Østby