NRK Meny
Normal

Bivdá FeFo-áirasiid sierra čoahkkimii

Sámediggeráđđi Silje Karine Muotka mielas lea hui duođalaš go Sámediggi ii nagodan stivregoahtit Finnmárkkuopmodaga.

Silje Karine Muotka

VUORJAŠUVVAN: Silje Karine Muotka dadjá iežas vuorjašuvvan go Sámedikki FeFo-áirasat eai leat soahpan gean sii háliidit stivret FeFo.

Foto: John Einar Jonsen Eira / NRK

Finnmárkkuopmodaga sápmelaš áirasat eai nagodan boahtit ovttaoaivilvuhtii gean sii háliidit stivrrajođiheaddjin.

Sámediggeráđi FeFo (Finnmárkkuopmodaga) ovddasvástideaddji Silje Karine Muotka (NSR) oaivvilda ahte dán galggašedje FeFo-áirasat nagodan čoavdit.

– Dat lea dieđusge hui duođalaš ja dat vuorjašuhttá mu. Dá lea dákkár ášši maid sii dieđusge livčče sáhttán čoavdit gaskaneaset, dadjá Muotka NRK:i.

FeFo stivrras lei stivrrajođiheaddji válga mannan bearjadaga. Raymond Robertsen (Olgeš bellodat) lei stivrrajođiheaddji ovdal čoahkkima, muhto dán háve lei Sámediggi guhte rievtti mielde galggašii stivrrajođiheaddji oažžut.

Muhto Sámediggeáirasat eai gávdnan oktasaš evttohusa.

Áigu čoahkkinastit FeFo-áirasiin

Muotka oaivvilda ahte áirasat maid Sámediggi lea válljen FeFoi galggašedje ovddalgihtii soabadan gean sii evttohit ođđa stivrrajođiheaddjin.

– Mun boađán bovdet daid Sámedikke nammaduvvon áirasiid čoahkkimii beasan gullat mo dilli lea čuožžilan, dadjá Muotka.

Man muddui áigu Sámediggi árvvoštallat lonuhit áirasiid, go eai nagot fámu váldit dalle go galggašedje?

– Dát digaštallan gullá dievasčoahkkimii Sámedikkis. Mun in sáhte okto ráđđeláhttun dego meannudit dán ášši. Muhto dat lea hui duođalaš jus Sámedikki nammaduvvon áirasat eai nagot ovttasbargat. Dat guoská ollislaš FeFo stivrrabargui, vástida Muotka.

Iešguđetge čilgehus

FeFo-stivrraáirras Marit Kirsten Anti Gaup (Bargiid bellodat) lei evttohan iežas stivrrajođiheaddjin, ja Sámedikki eará stivrraláhttu guoktá evttoheigga Máret Guhttora (NSR).

Marit Kirsten Anti Gaup og Mathis Nilsen Eira utenfor Scandic hotell i Karasjok

GAUP JA EIRA: Dá lea 2016 go Marit Kirsten Anti Gaup válljejuvvui stivrrajođiheaddjin nuppi háve. Mathis Nilsen Eira rávkkai sutnje lihkusávaldagai.

Foto: Carl-Gøran Larsson / NRK

Goalmmát Sámedikke nammaduvvon áirras Máhtte Nilsen Eira (boazodoalu ovddasteaddji FeFo-stivrras) dadjá NRK:i ahte lea Marit Kirsten Anti Gaup guhte ii leat sudno dorjon.

– Mun dadjen feaskáris ahte bohten doarjut Máret Guhttora, dasa ii miehtán Máret Risten, ja dajai ahte son bođii iežas evttohit. Nu son dagai go máhcaimet čoahkkimii, dadjá Eira NRK.i.

Gaup fas dadjá ahte lei eahpečielggas sutnje goabbá Guhttoris ja Eiras lei evttohuvvon stivrrajođiheaddjin.

– Go mii manaimet dohko čohkkedit de mun vehá healkkehin go Máret Guhttor árvalii Raymond Robertsena, mun gal jurddašin son evttoha nuppi dain Sámediggeáirasiin. Danin mun válden gieđa bajás ja lohken ahte go mis lea vejolašvuohta Sámedikkis oažžut stivrrajođiheaddji de mun gal boađán evttohit iežan jođiheaddjin, dadjá Gaup NRK:i.

– Ja de čájehuvvui ahte sámediggeáirras guoktá doarjjuiga fylkkadikki Raymond Robertsena ovdal go mu, lasiha Gaup.

Ronny Wilhelmsen

DOARJU GAUP: Ronny Wilhelmsen (Bb) oaivvilda ahte Marit Kirsten Anti Gaup berrešii válljejuvvon stivrrajođiheaddjin.

Foto: Dan Robert Larsen / NRK

Doarju bargoskihpára

Sámedikki Bargiid bellodaga parlamentáralaš jođiheaddji Ronny Wilhelmsen dadjá NRK Sápmái ahte ii leat buorre go ii šaddan ovttaoaivilvuohta.

Wilhelmsen doarju iežas bellodat bargoskihpára.

– Mun livččen vuordán ahte Marit Kirsten guhte ovdal leamaš stivrrajođiheaddji maiddái livččii sáhttán joatkit jođiheaddjin dán jagi, de livčče nana jietna viidáset FeFo-stivrras, dadjá Wilhelmsen.