Sámediggeráđđi sávvá kommišuvnna-raportta veahkkin eastadit sámevaši
Sámediggeráđđi Runar Myrnes Balto (NSR) atná stuorra dárbbu Duohtavuođa- ja soabahankommišuvnna raportii go sápmelaččat ain áitojuvvojit ja cielahuvvojit.
– Dat han lea leamašan mielde dál dokumenteremin buot daid boasttuvuođaid mat leat dáhpáhuvvan ovdal ja dat traumaid mat min álbmogis leat. Dat sámevašši maid mii dál oaidnit, ráhkada ođđa traumaid sápmelaččaide.
Son čujuha Sámedikki gáibádussii ásahit našunála doaibmabidjoplána sámevaši eastadeamis ja oaivvilda dehálažžan ahte kommišuvnna maid evttoha dan ásahit.
– Dál mun gal oaivvildan ahte dál ii leat šat ráđđehusas ágga manne ii dahkat dan. Nu ahte mii leat vuordimen dál ráđđehusa dan ektui, dadjá Myrnes Balto.
