Hans Ole Eira jávká – Berit Marie P. E. Eira álgá

Sámediggeráđđelahttu Hánski Niillasa Hans Ole, Hans Ole Eira lea leamaš buohccindieđihuvvon muhtin áigge. Dan dieđihii Sámediggi cuoŋománus.

Sámediggepresideanta Silje Karine Muotka (NSR) lei juohkán su politihkalaš ovddasvástideaddji surggiid eará ráđđelahtuide gaskaboddosaččat geassemánu 17. beaivái, čállá Sámediggi iežaset neahttasiiddus.

Sámediggeráđđi lei bovden preassakonferánsii dii. 12, gos almmuhit ráđi rievdadusaid.

Sámediggepresideanta Silje Karine Muotka čilge ahte sivva manin fertejit dahkat rievdadusaid, lea ahte ráđđi ii doaimma ovtta ráđđeláhtu haga guhkit áiggi.

– Mii dárbbašat olbmuid sajis sámediggeráđis go dat lea dan mađe stuorra bargu ahte eat sáhte čoavdit dan dain njealji ráđđeláhtuin mat leat báhcán, dadjá Muotka.

Hans Ole lea leamaš sámediggeráđis 2020 rájes. Álggus Aili Keskitalo (NSR) sámediggeráđis. 2021 rájes fas Silje Karine Muotka sámediggeráđis.

Juhána Biera Biret Márjá, Berit Marie P. E. Eira dat galgá doaibmat sámediggeráđđelahttun Hans Ole sajis.

Ođđa parlamentáralaš jođiheaddji

Berit Marie P. E. Eira lea boazoeaiggát ja politihkkár. Son lea Johttisápmelaččaid listtu parlamentáralaš jođiheaddji ja lea ealáhus- ja kulturlávdegotti miellahttu.

Son lei sámediggeráđđelahttu guokte álgojagi mannan sámediggeáigodaga, 2017-2019.

Dál son lávke fas sámediggeráđđái, gaskaboddosaččat.

Berit Marie P. E. Eira lea giitevaš luohttámuša ovddas.

– Dát lea dieđusge hui mávssolaš, dát lea alla virgi dáppe ja dus lea nu stuorra ovdasvástádusa, dadjá Eira

Son muitala ahte buot gávcci áššesuorggi leat dakkárat maid son dovdá bures.

– Dat leat dakkárat main mus lea hui guhkes vásáhus bargat, mus leat olu iešguđegelágan luohttámušdoaimmat leamaš main lean bargan, ja nu go mun ieš láven lohkat mun lean boazodoallopolitihkkár, dadjá Eira.

Johttisápmelaččaid listtu ođđa parlamentáralaš jođiheaddji lea John Mathis Utsi. Politihkalaš ráđđeaddin boahtá Anne Henriette Nilut (NSR) su sadjái.

Álgá ođđa bargui

Eirik Larsen (NSR), politihkalaš ráđđeaddi maid heaitá. Sandra Márjá West (NSR) boahtá su sadjái.

Preassadieđáhusas Sámiráđis boahtá ovdan ahte Larsen lea virgáduvvon Sámiráđi olmmošvuoigatvuođaossodaga jođiheaddjin.

– Mus lea stuorra illu fas searvat Sámiráđi bargui, ja mun lean ilus go beasan bargat sámi organisašuvnnas ja áššiiguin maidda mus lea stuorra beroštupmi. Olmmošvuoigatvuođat leat áitojuvvon, ja sámi siviilaservodagas lea hui deaŧalaš rolla sihke sámiid ja eará álgoálbmogiid olmmošvuoigatvuođaid suodjaleamis ja ovddideamis, dadjá Larsen.

Larsen lea doaibman sámediggeráđi ráđđeaddin sihke dán sámediggeáigodaga, ja mannan áigodaga 2017-2021. Son álgá ođđa virgái borgemánu 7. beaivve 2023.