Doaivva ođđajahkái, muitala presideanta ođđajagesártnis

– Vuosttaš maid jurddašan lea «wow». Mun gal in jáhkkán ge ahte mu bargu Instagram siiddus lea namuhan veara ge, lohká Elle Save Johansdatter Gaup.

Sámediggepresideanta Silje Karine Muotka namuha ge ođđabeaisártnis nuorra koahka Elle Sáve Gaupa gii lea álggahan Instagram-konto Njálggat.

Kontos son addá borramušrávvagiid ja evttoha mo ođđa áiggis sáhttá málestit árbevirolaš ávdnasiiguin.

– Borramušsihkkarvuohta, máhttu min ođasmahtti resurssaid birra, ja mo dan máhtu ovddosguvlui suodjalit, lea mávssolaš, dadjá Muotka

Čájehit man dehálaš lea doalahit ja borra árbevirolaš biepmuid lea ge juoga mii lea Elle Sáve váimmu lagamus.

– Mun geahččalan čalmmustahttit ahte mis leat olu biepmut maid sáhttá fidnet luonddus ja lagasbirrasis maiguin sáhttá geahččalit eallit nanaguoddevaččat.

Danne lea ge Elle Sávii somá oaidnit ahte ovttastuvvon našuvnnain (ON) nai oidnet man dehálaš eamiálbmogiid biebmovierut leat.

– Mearkkaša hui olu ahte doppe leat olbmot geat oidnet dehálašvuođa gáhttet árbevieruid, ja ahte vuoruhit bidjat dasa návccaid.

Maiddai sámediggepresideanta rámiida dán doaimma.

– Min biebmu lea dehálaš, ja danin lea ON gieskat álggahan álgoálbmotovttastusa mii sihkkarastá álgoálbmogiid borramušvuogádagaid.

Nannet sámegielaid boahtteáiggi

Presideanta humai maiddai mánáidforuma birra sártnistis. Mánáidforuma ásahuvvui dán jagi Sámedikkis vai sámi mánáid jienat galget gullot.

Mánát celke forumas ahte sis váilot oahpaheaddjit. Mánát maid sávve ahte buot oahpaheaddjit galggašedje buorebut dovdat sámi diliid.

– Jos galgá nannet sámegielaid boahtteáiggi, de lea dárbbašlaš fidnet eambbo sámegieloahpaheaddjiid ja mánáidgárdeoahpaheaddjiid, celkkii presideanta sártnistis.

Muotka muitalii ge sártnis ahte Sámediggi lea ráđđehusain ovtta oaivilis ahte dán jagi ovddiduvvo stuorradiggedieđáhus mo sáhttit fidnet eanet sámegieloahpaheaddjiid ja sámi mánáidgárdeoahpaheaddjiid.

Dehálaš bargu

Dán jagi galgá maid Duohtavuođa- ja soabahankommišuvdna gárvvistit raportta ja buktit árvalusaid doaibmabijuide. Silje Karine Muotka reflekterii mo dát proseassa lea leamašan sártnis.

– “Állet čierut min siva haga” dajai Therese Olli Sara álbmotčoahkkimis ovdal go kommišuvdna ásaduvvui. Dan mun muittán ja jurddašan juohke beaivve, logai presideanta.

Muotka deattuha ahte kommišuvnna bargu lea dehálaš ja ferte váldot duođalažžan.

– Mii eallit buohkat dán politihka váikkuhusaiguin. Dat lea dahkan ollu váivviid, ja dan bohtosat eai sáhte dušše sihkastuvvot vai jávket. Ferte gieđahallat dan maid kommišuvdna lea gávnnadan maŋŋil go leat háleštan badjel guhttačuođivihttalogi (650) duohtavuođavihtaniiguin.

Doaivva ođđajahkái

Muotka muitalii sártnis ahte son diehtá ahte sámis vásihat garra sisabahkkemiid eatnamiidda, ja energiijapolitihka mii hástala min buohkaid.

– Mii rahčat boahtteáiggi ovddas, go min kultuvra ja eallinvuohki lea čadnojuvvon lundui ja dasa maid luondu addá.

Son geassá Fovsen-ášši ovdan ja deattuha ahte máttasápmelaččat dárbbašit vuoiggalaš boahtteáiggi.

– Riektestáhtas lea guovddážis ahte riektemearrádusat doahttaluvvojit ja dan dihtii mun ferten gáibidit ahte dat dáhpáhuvvá.

Muotka dadjá ahte lea dehálaš ahte mii eallit daid eavttuid mielde maid luondu addá, go dat leamaš vuođđun dasa maid ovddeš buolvvat leat huksen.

– Dan ala mii galgat nannet min eallima vai mis maid lea juoidá maid addit boahttevaš buolvvaide.

Sámediggepresideanta Silje Karine Muotka loahpahii sártni fiinna sániiguin mainna buktá doaivaga ođđajahkái.

– Go giđđa máizada, de jieŋat moallanit ja nállojieŋat šávvet ja skilaidit jávregáddái. Stuora fámut leat jođus go giđđa gohccáha luonddu ja nu maid birgenlági, ja seamma fámuin ja dáhtuin sáhttit mii láhčit buoret ja vuoiggalut eallima máilbmái.