NRK Meny
Normal

Sáme jienastiddje ælla dudálattja

Badjelasj jahke l ájn åvdås válggalihttáj galggap jienajt biejatjit boahtte suohkanstivraválggaj. Valla sáme Divtasvuonan ælla bárep dudálattja udnásj Divtasvuona-suohkanoajve sámepolitihkajn.

Tor Asgeir Johansen

Divtasvuona suohkanoajvve Tor Asgeir Johansen.

Foto: Harrieth Aira

– Iv mån bárep suv dåbdå. Ij gåjt vuojnnu ja gullu nav vuojga.

Dav javllá akta sáme jienastiddje Divtasvuonan gå mij sujsta gatjádijma jus sån la dudálasj dajna bargujn majt suohkanoajvve maŋemus jagijt la barggam Divtasvuonan.

Badjelasj jahke l ájn åvdås válggalihttáj galggap jienajt biejatjit fylkadikke- ja suohkanstivraválggaj.

Daj lågev sámesuohkanijn ma li sámegiela háldadimguovlon Vuonan gullat dal ienemusá suohkanåjvijs sihti joarkket, jus dal jienastiddje dav sihti.

Divtasvuonan ælla sáme jienastiddje bárep dudálattja udnásj suohkanåjvijn mij guosská sáme ássjijda.

Miella joarkket

Divtasvuona suohkanoajvve Tor Asgeir Johansen javllá dåhkki dal buorebuv barggat, valla huoman sån vuojnná dát la suv mielas riek buoragit mannam.

– Ulmusj diehttelis máhttá buorebuv barggat, båhti ham ássje majt ij la vuorddám gå ulmusj galggá duov-dáv dahkat, valla ienemusát la de dát ham viehka buoragit mannam, javllá Johansen.

Ja dajna de aj Divtasvuona suohkanoajvváj la geldulasj ådå válggagávdan suohkanoajvven liehket.

– Diehttelis luluj geldulasj joarkket suohkanoajvven. Dá jage li miellagiddisa læhkám, så luluj suohtas ájn joarkket, javllá Johansen.

Juska dal Tor Asgeir Johansen sihtá joarkket, de la huoman jienastiddjij duogen jus dav oadtju.

– Barggam biekka vuosstuj

Varresvuoda- ja giellagatjálvisá li gullat sámij gaskan ájnnasa Divtasvuonan.

Ja dan bargguj ælla jienastiddje gej mij ságastijma bárep dudálattja udnásj suohkanåjvijn.

– Iv la dal bárep tjuovvum suohkanpolitihkav. Valla vuojnnet ælla nav moadda sáme giellaarena dán suohkanin, sihke doarjjagav skåvlåjda ja mánájgárdijda, ja aj vuorasulmutjij huksuj, javllá akta jienastiddjijs Divtasvuonan gejna mij ságastijma.

– Divtasvuodna la máj sámegiela háldadim guovlon ja muv mielas ij la suohkanoajvve dahkam dav bargov maj galgaj dan hárráj. Sån ij la gæhttjam Ájluovta-bælláj ja mån guláv mij lip dagu biekka vuosstuj barggam, njuvddám biekka vuosstuj. Så iv la mån bárep dudálasj suv bargujn mij gullu sáme ássjijda, dættot vas ietjes jienastiddjijs.

– Sámij hárráj mij gullu varresvuoda dievnastusájda ij la tjoavdos boahtám, så iv la de mån dajna bargujn dudálasj, javllá goalmát.

Ælla mierredam

Dáj jienastiddjij gej mij lip ságastam e ga vatte udnásj suohkanoajvváj tjielgga rádev diededit ietjás boahtte suohkanoajvvekandidáhttan.

Sij sihti vuostak vuojnnet gudi li kandidáhta åvdås majdik mierredi.

Gut la duv suohkanoajvvekandidáhtta? gatjádijma jienastiddjijs.

– Iv la mierredam majdik gå iv diede gudi sjaddi kandidáhta, javllá akta jienastiddjijs.

– Hæhttuv vuorddet ja gæhttjat gut la kandidáhtta ja gæhttjat gåsstå boahtá ja suv duogátjav ja majt sån åvdet. Berus gus sån sámijt ja sáme ássjijt? Så iv la madik mierredam valla árvvedav mij gávnnap buorre suohkanoajvev, nammat nubbe.

– Iv la mån dáppe nav mælggadav årrum jut diedáv gudi littji hiebalgis kandidáhta. Ja iv mån dal diede jus sån lulu hiebalgis suohkanoajvven, gå iv la gåjt mån vuojnnám makkirik merka sån la buoredam dilev sáme pasientajda, dættot goalmát.