Gitta áttjak lij suv namma Jonas Michael Paulsen, valla dálla la ietjas tjállegoahtám sáme fuolkkenamájn Tjågne.
Tjågne ij la maŋepnamman aneduvvam badjel tjuohte jahkáj. Maŋemus gut ietjas Tjågne namájn tjálij lij Jonasa máttar-máttar áddjá.
– Muv mielas lij ájnas Tjågne namáv adnuj válldet. Ij la aktak vuona jalik svieriga bielen gut ietjas dájna namájn tjállá. Vájvve jus namma lij muv fuolken ållu gáhtot.
Svieriga bielen aj dáhpáduvvá
Jonas la akta moaddásijs Divtasvuonan guhti ietjas dáttja namáv la målssum sáme fuolkkenamájn.
- Dåssju maŋemus máno ájge diedáv guoktásav vil gudi libá sáme fuolkkenamáv adnegoahtám, subtsas Jonas.
Åvddåla målssum sáme Svierigin ietjasa maŋepnamájt ienep láttij-lágásj namman. Dav dahkin gå sihtin garvvet badjelgæhttjamav ja boasto giehtadallamav.
- Lågå aj:
– Dálla l vuojnnet rievddam, ja moaddása målssu ietjasa svenska maŋepnamájt sáme fuolkkenamájda, javllá Märit Frändén, Uppsala universitiehta nammaarkijva dutke.
Sån tjielggi ulmutja li ienep mihá ietjas sámevuodas.
– Ij la desti binnep árvos jus ietjas sámevuodav vuoset, javllá.
Namá dárojduhteduvvin
Ragnhild Lien Rahka barggá Árran julevsáme guovdátjin Ájluovtan, ja sierraláhkáj berus bájkálasj histåvrås ja fuolkkeguoradallamis. Sån la iesj tjállegoahtám ietjas sáme fuolkkenamájn Rahka nágin jage dássta åvddåla.
Rahka subtsas sáme fuolkkenamá gáhtun gå sij gudi svieriga bieles vuona bælláj jåhtålin tjáleduvvun vuona girkkogirjijda 1800-lågon.
SÁME NAMÁ GÁHTUN: Ragnhild Lien Rahka subtsas sáme fuolkkenamá gáhtun gå sáme vuona girkkogirjijda tjáleduvvin.
Foto: PrivatDaj sadjáj oattjoj farra áhtje åvddånamáv maŋepnamman, ja duodden sáme åvddånamá aj dárojduhteduvvin.
– Amma sjattaj Amund, Pavva sjattaj Paul, Gahte sjattaj Karen, Nuhtte sjattaj Knut.
Valla vájku sáme fuolkkenamá almulasj regisstarijs gáhtun, de ælla ållu gáhtum. Da li ájmon aneduvvam njálmálattjat.
– Mij lip agev diehtám makkir fuolkijda gullup, ja fuolkkenamá li njálmálattjat aneduvvam tjielggit guhtimusj la. Muv áhkko agev ietjas almulasj dáro namáv vuostak javlaj, ja agev låhpadij Rahka-niejdda, vájku Rahka namma ittjij makkirak almulasj regisstarijn gávnnu.
Sávvá iehtjáda tjuovvu
Gå Jonas mierredij sån galgaj sáme fuolkkenamájn ietjas tjállet, de lidjij sujna moadda vejulasjvuoda.
– Lidjiv máhttet válljit Stuorsoabbe jali Gælok aj, valla Tjågne lij muv vájmo lagámus.
Suv mielas la suohtas gå sujna l namma mij dåssju sujna l. Sæmmi bále sávvá iehtjáda suv tjuovvu.
– Luluj hávsske jus ienebu gudi Tjågne fuolkkáj gulluji lidjin ietjasa namáv ruopptot válldám. Ij la máj geldulasj gå juohkkahasj galggá ietjas tjállet Paulsen, Johnsen jali Mikkelsen. Sáme fuolkkenamá li ham ienep sierralágátja, låhpat Jonas Michael Tjågne.
Jårggåliddje: Lars Theodor Kintel/Kintel AS
