– Go filbma lea fasken nuppelohkái filbmabálkkašumi, de goit mun oainnán filmmas stuorra vejolašvuođa vuoitit bálkkašumi gaskavahku, lohká Internášunála Sámi Filbmainstituhta direktevra Anne Lajla Utsi.
Dat vihtta filmma mat gilvalit leat Dánmárkku filbma «Forældre», Suoma filbma «Tyttö nimeltä Varpu » (Little Wing), Islándda filbma «Hjartasteinn», Norgga filbma «Fluefangeren» ja vel dát sámi filbma, mii dál lea Ruoŧa nominašuvdna, «Sameblod» (Sámi varra).
Rahppá vejolašvuođaid
«Sameblod» bagadeaddji ja muitalusčálli Amanda Kernell, su eat leat otne fidnen ságaide, muhto Internášunála Sámi Filbmainstituhtas lohket stuorra gudni go sámi filbma lea árvaluvvon ja sáhttá vuoitit Davviriikkaid ráđi bálkkašumi.
Diet filbma sáhttá rahpat olu vejolašvuođaid sámi filbmabargui, lohká Utsi.
Justa dál lea Internášunála Sámi Filbmainstituhtas ovttasbargu ahte ásahit riikkaidgaskasaš filbmafoandda, mas Canada ja Kaalallit Nunaat álgoálbmot filbmaásahusat leat mielde.
– Ja mii galgat maid Davviriikkaid ráđiin gulahallat dán hárrái, lohká Anne Lajla Utsi.
Sámi filmmaid mielde
Ruoŧŧa dat lea árvalan «Sameblod» filmma dán jagi Davviriikkaid ráđi filbmasuorggi bálkkašupmái.
– Mun oainnán gal ahte livččii vuogas jos sámefilmmaid maid sáhtášii árvalit Davviriikkaid ráđi filbmabálkkašupmái, nu go sámi giellaguovllus sáhttet árvalit girjjiid bálkkašumiide, lohká Anne Lajla Utsi.
Paltto girji mielde
Davviriikkaid ráđi mánáid- ja nuoraidgirjjálašvuođa bálkkašupmái lea dán jagi Kirste Paltto girji «Luohtojávrri oainnáhusat» árvaluvvon. Dien suorggis gilvala Paltto girji 11:in eará evttohasain, maid Dánmárkkus, Suomas, Fearsullos, Islánddas, Norggas ja Ruoŧas leat árvalan.
– Eai mus leat nu hirbmat stuorra vuordámušat gal gaskavahku eahkeda, lohká girječálli Kirste Paltto, geainna leat háleštan telefovnna bokte Helssegis.
Gaskavahku vuoitojuohkkin
Girjelágádus Davvi Girji dat lea almmuhan girjji «Luohtojávrri oainnáhusat», muhto eat lihkostuva oažžut Davvi Girjji lágádusdoaimmaheaddji Máret Gutnel Sara gal ságaide, muhto son lei hui movtta cuoŋománus go Davviriikkaid ráđđi almmuhii daid, geat leat árvaluvvon dán jagi mánáid- ja nuoraidgirjjálašvuođa bálkkašupmái.
Dán jagi Davviriikkaid ráđi bálkkašumiid juohkin lea dán gaskavahku, skábmamánu vuosttaš beaivve.