Sáhttet massit eatnamiid ja bivdovuoigatvuođaid

Finnmárkku boanddat geat Finnmárkkuopmodagas láigohit eatnamiid eanandoallodoibmii, eaige ane eatnamiid eanandoalu doibmii manahit láigošiehtadusa Finnmárkkuopmodagain. Dán lea FeFo ja Finnmárkku Boanddaidsearvi aiddobáliid soahpan gulahallančoahkkimis.

FeFo og Bondelaget

Gurut ravddas Jan Olli ja Sverre Pavel, FeFo, ja olgeš bealde Markus Heiberg ja Terje Balandin Finnmárkku boanddaidsearvi, leat šiehttan máhcahit láigoeatnamiid fas Finnmárkuopmodahkii.

Foto: FeFo

Lea Finnmárkku Boanddaidsearvi mii loktii dán ášši gulahallančoahkkimis gaskal Finnmárkkuopmodaga ja Finnmárkku Boanddaidsearvvi dá gieskat. Boanddaidsearvvi nubbijođiheaddji Markus Heiberg, lohka Boanddaidsearvvi dán dahkat vai sihkkarastit doarvái eatnamiid boanddaide.

Eai geavahuvvo eanandoalus

-Miehtá Finnmárkkus leat eatnamat mat leat láigohuvvon eanandoalu doaimmaide, muhto eai leat šat anus eanandoalu doaimmaide. Sii geat eatnamiid leat láigohan fas láigohit dáid eatnamiid earáide.

Dán dadjá Finnmárkku boanddaidsearvvi nubbijođiheaddji, Markus Heiberg, ja ávžžuha boanddaid sidjiide dieđihit, jus dihtet ahte Finnmárkkus leat eatnamat main dál eananláigolaš ii doaimmat eanandoalu.

Manahit luossabivdovuoigatvuođaid

Markus Heiberg dadjá ahte oallugiin geain leat láigohan eanandoalloeatnamiid Finnmárkkuopmodagain dinejit ruđaid go sii fas láigohit eatnamiid eará boanddaide, muhto dáidet maiddái bisuhit eatnamiid vai doalahit luossabivdovuoigatvuođaid. Son dadjá ahte muhtumat gal dáidet massit luossabivdovuoigatvuođaid, muhto eai sii dasa gal bija návccaid.

Markus Heiberg, Holmesund i Tana

Markus Heiberg ávžžuha boanddaid geain leat dieđut dákkár láigošiehtadusaid birra váldit oktavuođa Finnmárkku Boanddaidservviin.

Foto: FOTO: Nils Henrik Måsø / NRK

-Boanddaidsearvvi bargu lea sihkkarastit doarvái eatnamiid boanddaide geain leat oamit ja galget eallit eanandoalu dietnasiiguin, dadjá Markus Heiberg.

  • Guldal Finnmárkku Boanddaidsearvvi nubbijođiheaddji, Markus Heiberg, vástádusaid dás:
  • Loga dárogillii bivdovuoigatvuođaid birra dás:

Nannendihte ealáhusa

Finnmarkkuopmodaga derektevra, Jan Olli, lohka FeFo čuovvolan dán ášši maŋŋil go Finnmárkku Boanddaidsearvi dan lokti gulahallančoahkkimis.

–Mii eat dieđe man ollu eanamiin ja guđe guovlluin lea sáhka. Mii fertet váldit oktavuođa suohkaniiguin ja eanandoalloeiseválddiiguin vai mii oažžut dárbbašlaš dieđuid, dadjá jan Olli.