Árdna- sámi kulturmágasiidna sáddejuvvo NRK1s duorastaga golggotmánu 25. beaivve diibmu 17.25. Prográmma čoavddasánit leat álás dáiddár, dáidda mánáidgárddis ja sámi hiphop-musihkka.
Sáhttágo oamastit dáiddadagu?
Gieskat bolddii dáiddár Marianne Aulie klovdnagovaidis ávdin sullos máddin. Badjelis dáiddáris ledje dušše unna binnabánna sisbuvssažat. Muđui son lei áibbas álás. Dušše rumašmála govččai Aulie čiččiid ja eará rumašlahtuid.
Sápmelaš dáiddár Stein Erik Wothi bolddii sarvvanáhkkegovaidis Kárášjoga johkajieŋa alde bealnjealjat jagi dassái. Dál son oaivvilda, ahte Aulie dáiddadahku sakka muittuha dan maid son lea jo dahkan. Ártnas jerrojuvvo, ahte leago Marianne Aulie áddestallan Stein Erik Wothi? Ja sáhttágo oppanassiige oamastit dáiddalaš dagu dahje jurdaga?
Dáiddalaš mánáidgárdi
Dáidda lea vuosttaš maid oainnát go boađát Guovssahas mánáidgárdái Romsii. Mánáidgárdi lea oainnat oastán dáidaga mii galggašii movttidahttit mánáid dáiddalašvuhtii.
Dáiddár Outi Pieski lea ráhkadan dáidagiid mat leat dan muttos nannosat, ahte dat galggašedje gierdat go mánát daiguin stohket. Ártnas gullat maid sihke mánát, dáiddár ieš ja mánáidgárdde bargit oaivvildit dáidaga birra.
Duolva Duottar
Hiphop lea nuorraolbmuid musihkka miehtá máilmmi. Nu maiddái dáppe Sámis. Ártna dán mánu guossin leage Guovdageainnu ráppjoavku Duolva Duottar.
Joavku ásahuvvui sullii jagi dassái. Sin musihkka lea álggus vuos dušše gullon NRK Urørt neahttasiidduin ja nuoraid giehtatelefovnnain, muhto dál lea joavku eambbo aht` eambbo oidnogoahtán feara makkár lávddiid alde Norggas, Ruotas ja Suomas.
Loga maiddái
