NRK Meny
Normal

Sáhttá nammaduvvot presideantaevttohassan

Son sáhttá nammaduvvot Árjja bellodaga ođđa presideantaevttohassan maŋŋil go dálá evttohas, Láilá Susanne Vars, mearridii luohpat politihkkalaš doaimmain.

Inger Eline Eriksen (Árja) sámedikkis bártniinis Hiljein.

Árjja bellodaga sámediggeáirras, Inger Eline Eriksen sáhttá nammaduvvot bellodaga presideantaevttohassan, maŋŋil go Árjja sámediggeáirras, Láilá Susanne Vars, mearridii luohpat politihkkalaš doaimmain.

Foto: Berit Nystad / NRK

– Árjja bellodaga sámediggeáiras, Inger Eline Eriksen, sáhttá nammaduvvot bellodaga presideantaevttohassan.

Dan dadjá Árjja bellodaga stivrrajođiheaddji, Trond Einar Karlsen.

Liigečoahkkin mearrida

Son deattuha ahte lea gal bellodaga liige jahkečoahkkin mii loahpalaččat mearrida gii bellodaga presideantaevttohas galgá leat, ja dadjá ahte stivra gal ollásit doarju Eriksena presideantaevttohassan.

Árjja bellodaga liige jahkečoahkkin lágiduvvo Oslos dán jagi golggotmánu loahpageahčen, muitala Karlsen.

Guhká diehtán

– Bellodaga stivra lea guhká juo diehtán ahte Láilá Susanne Vars lei mearridan luohpat politihkkáriin, go son bargá Gáldus, mii dál galgá sirdojuvvon Norgga našonála olmmošvuoigatvuođaásahusa vuollásažžan.

Dan muitala Karlsen, muhto dadjá ahte stivra easkka dá gieskat lea ožžon dieđu goas dát dáhpáhuvvá.

Ii vel mearridan

–Son ii leat vel mearridan vuolgá go bellodaga presideanta evttohassan. Nu vástida Inger Eline Eriksen, ja lohka fertet dan čielggadit bearrášiinnis.

Eriksen lohka maiddái fertet guláskuddan iežas bargoaddiin. Inger Eline Eriksen nammaduvvui duopmárfapmohassan Sis-Finnmárkku doggágoddái diibmá borgemánus.