Sáhkohan guolleturisttaid

Vuot leat tuollárat Kivilompolo tuollostašuvnnas, máttabeale Guovdageainnu, bissehan turisttaguolásteaddji gii geahččalii fievrredit stuorát guolenoađi go dan lobálaš rájá mii lea 15 kilo filea. Ikte lei Polen gullevaš almmái gii sáhkohalai 7000 kruvnnain vearredagu ovddas, čállá Altaposten. Árat dán vahkus leat guokte eará biillas sáhkohallan vihtta olbmo go leat geahččalan guollefileaid doalvut olggos Norggas ja maid mannan vahkus ledje stuorra sáhkut olgoriikalaš turisttaide geat leat leamaš luomus Norggas.