– Ávvudoalut joatkašuvvet boahtte vahkus, ja galget lágiduvvot miehtá Sámi, muitala aviisa váldodoaimmaheaddji, Geir Wulff.
Ii loga agi gal moktige deaddit aviisa.
– Eat mii gal leat boarásmuvvan dan geažil go aviisa deavdá 60 jagi. Mii leat baicce gievrun jagis jahkái, son himiha.
Ruhtaváttisvuohta
Geir Wulff lea leamaš Ságaha váldodoaimmaheaddji 1978 rájes.
- Guldal:
– Stuorámus hástalus lea leamaš ekonomiija ja oažžut áddejumi stuorraservvodagas ahte sápmelaččat leat sierra álbmot ja ahte mis lea dárbu iežamet aviissaide, Wulff čilge.
Unnán ássiid geažil ii loga leat gánnehahtti márkan Sámis doalahit áviisa stáhta doarjaga haga.
– Dat lea leamaš stuorámus oaivebávččas aviisa riegádeami rájes juo, son muitala.
Dál sii illudit go sámi aviissain lea sierra doarjjaortnet stáhtabušeahtas.
– Man guhká áiggut leat Ságaha válddodoaimmaheaddjin?
– Nu guhká go dearvvašvuohta gierdá, son vástida.
Siskkáldas riiddut
Ságat aviissas lea girjás historjá, ja álggahuvvui dáruiduhttima áiggis. Makkár giela, dárogiela vai sámegiela, galggai aviisa geavahit ja makkár redakšunealla linjjá galggai lean aviissas?
Dát ledje dakkár gažaldagat mat mielddisbukte garra digaštallamiid álggos. Siskkáldas riidduid geažil ja ruhtaváttisvuođaid geažil máŋga redaktevra gárte heaitit, bákkkus dahje iešdáhtus.
Ášši joatkašuvvá gova vulobealde:
Bjarne Store-Jakobsen lei maŋemuš redaktevra ovdal go Geir Wulff virgáduvvui.
– Mun ieš celken eret dan geažil go ii lean vejolašvuohta rievdadit aviisa dan guvlui maid mun háliidan dalle, čilge Store-Jakobsen.
Rápmo aviisa
Su mielas aviisa livččii galgan šaddat dakkár mii čilge Sámi servvodat áššiid historjjálaš perspektiivvas.
- Guldal:
– Lean ilus go aviisa lea rievdan rivttes guvlui. Ovdal han dat lei dakkár mii áiggui dáruiduhttit sápmelaččaid, vástida Store-Jakobsen.
Dál son rápmo dálá redaktevrra Geir Wulffa ja aviisa bargiid.
– Aviisa ovdal ja dál, dat lea dego idja ja beaivi. Dat lea duođai šaddan dakkár aviisa mii speadjalastá bures sámi servvodaga.
– Makkár ávki das lea?
– Das lea ávkin eiseválddiide ja earáide geat eai dovdda Sámi historjjá ja otná servvodagaid hástalusaid. Daid birra sii dál besset lohkat dárogillii, go sin gaskkas leat ollu geat eai ádde sámegiela, vástida Bjarne Store-Jakobsen.